كارنامەی نێچیرڤان بارزانی لە كۆنفرانسی ئاسایشی میونشن كۆتاییهات

پاش ئەوەی لە 17 تا ئەمڕۆ 19ی شوباتی 2023، نێچیرڤان بارزانی، سەرۆكی هەرێمی كوردستان، بەشداری لە كۆنفرانسی ئاسایشی میونشدا كرد، ئەمڕۆ یەكشەممە كۆتایی بە بەرنامەی دیدار و كۆبونەوەكانی هات.
لە ماوەی سێ ڕۆژی كۆنفرانسەكەدا نێچیرڤان بارزانی لەگەڵ ژمارەیەك لە سەركردە و وەزیرانی دەرەوە و بەپرسانی باڵای وڵاتان كۆبووەوە، لەوانە: سەركۆماری ئازەر‌بایجان، سەرۆك وەزیرانی پۆڵۆنیا، ئەرمەنستان، عێراق، وەزیرانی دەرەوەی ئەمەریكا، بەریتانیا، ئیتالیا، ڤاتیكان، نەرویج، قەتەر، كوێت، ئوردن، سەرۆكی كۆمسیۆنی ئەورووپا، جێگری سەرۆك و بەرپرسی باڵای كاروباری دەرەوە و سیاسەتی ئەمنیی كۆمسیۆنی یەكێتیی ئەورووپا، لەگەڵ دوو شاندی كۆنگرێسی ئەمەریكا، یاریدەدەری وەزیری بەرگریی ئەمەریكا بۆ كاروباری ئاساییشی نێودەوڵەتی، وەزیری دەوڵەت لە وەزارەتی هەماهەنگیی ئابووری و پەرەپێدانی ئەڵمانیا، جێگری سەرۆكی كۆمیتەی كاروباری دەرەوە لەگەڵ شاندێكی پەرلەمانی ئەڵمانیا، شاندی گرووپێكی پەرلەمانتا‌رانی پارتی (SPD)ی لە پەرلەمانی ئەڵمانیا و چەندین كەسایەتی و ئامادەبووی دیكەی كۆنفرانسەكە.
لە دیدار و كۆبوونەوەكاندا دۆخی سیاسی و ئەمنی و ئابووریی عێراق و هەرێمی كوردستان، پەیوەندییەكانی هەولێر و بەغدا و گفتوگۆی چارەسەركردنی كێشەكانیان، پەیوەندییەكانی عێراق و هەرێمی كوردستان لەگەڵ وڵاتان و برەودان بە بوارەكانی هاریكاریی هاوبەشیان، دۆخی ڕۆژهەڵاتی ناوەڕاست و ناوچەكە بەگشتی و گرنگیی پاراستنی ئارامی و سەقامگیری و چارەسەركردنی ئاشتیانەی كێشە و ناكۆكییەكان، پرسەكانی وزە و ئاسایش و بەرەنگاربوونەوەی تیرۆر و چەند پرسێكی دیكەی جێی بایەخی ئامادەبووانی كۆنفرانسەكە، تاوتوێكران.