دوایین ئاماری گیانله‌ده‌ستدان و بریندارانی بوومه‌له‌رزه‌كه‌ی ئه‌مشه‌و

له‌ هه‌ردوو وڵاتی توركیا و سووریا دوایین ئاماره‌كانی گیانله‌ده‌ستدان و برینداران به‌هۆی بوومه‌له‌رزه‌كه‌ی ئه‌مشه‌وی پارێزگای هاتای بڵاو كرایه‌وه‌.

وه‌زاره‌تی ناوخۆی توركیا ئاشكرای كرد: به‌هۆی بوومه‌له‌رزه‌كه‌ی ئه‌مشه‌و 3 كه‌س گیانی له‌ده‌ستداوه‌ و 213 كه‌سی تریش بریندار بوون.

سه‌باره‌ت به‌ ژماره‌ی قوربانییانش له‌ سووریا، تیمه‌كانی به‌رگریی شارستانی باكوری ئه‌و وڵاته‌ بڵاویان كرده‌وه‌ كه‌ 130 كه‌س بریندار بوون.

ئه‌مشه‌و دووشه‌م كاتژمێر 8 به‌كاتی توركیا، بوومه‌له‌رزه‌یه‌كی به‌هێز به‌ پله‌ی 6.4 پله‌ی ڕێخته‌ر له‌ ناوه‌ندی پارێزگای هاتای له‌ باشووری توركیا ڕووی دا‌.

به‌هۆی به‌هێزی بوومه‌له‌رزه‌كه‌، هاووڵاتییانی زۆرێك له‌ ناوچه‌ سنوورییه‌كانی نێوان توركیا و سووریا و هه‌روه‌ها وڵاتانی لبنان و فه‌ڵه‌ستین و ئوردن و چه‌ند ناوچه‌یه‌كی تریش هه‌ستیان به‌ بوومه‌له‌رزه‌كه‌ كرد‌.

وه‌زاره‌تی ناوخۆی توركیا ئاشكراشی كرد كه‌ هه‌ر ئه‌مشه‌و دوای بوومه‌له‌رزه‌ به‌هێزه‌كه‌، 26 پاشه‌ بوومه‌له‌رزه‌ی تر له‌ پارێزگای هاتای ڕوویانداوه‌.