ئەمەریكا پێشوازی لە سەردانەكەی شاندی حكومەتی هەرێم بۆ بەغدا دەكات

باڵیۆزی ئەمریكا لە عێراق،پێشوازی لە سەردانەكەی ئەم دواییەی شاندی حكومەتی هەرێمی كوردستان بۆ بەغدا دەكات.
ئەلینا رۆمانۆسكی،باڵیۆزی ئەمریكا لە عێراق، لە هەژماری تایبەتی خۆیدا لە تۆڕی كۆمەڵایەتی تویتەر نووسیویەتی: پێشوازی لە سەردانەكەی ئەم دواییەی شاندی حكومەتی هەرێمی كوردستان بۆ بەغدا دەكەین، بۆ گفتوگۆكردن لەگەڵ حكومەتی بەغدا سەبارەت بە بوودجەو نەوت.
هەروەها نووسیویەتی: چارەسەركردنی ئەم جۆرە پرسە هەڵپەسێردراوانە، خزمەت بە بەرژەوەندی نیشتمانی عێراق دەكات و بەشدارە لە سەربەخۆیی وزە و سەقامگیری ناوچەكە.
شایانی باسە ئەمڕۆ  سێشەممە د. جوتیار عادل، گوتەبێژی حكومەتی هەرێم و ئەندامی شاندەكە، لە لێدوانێكدا بە پێگەی فەرمیی حكومەتی هەرێمی ڕاگەیاند: "حكومەتی هەرێمی كوردستان، لەسەر بنەمای رێككەوتنە سیاسییەكەی پێكهێنانی حكومەتی سودانی، بۆ داڕشتن و ئامادەكردنی یاسای بودجەی 2023 و یاسای نەوت و گاز و چەندین بابەتی پەیوەندیدار سەردانی بەغدای كرد و لە كۆبوونەوەی لەگەڵ حەیان عەبدولغەنی، وەزیری نەوتی عێراق، بەشێوەی گشتی لەسەر كۆمەڵێك بابەتی پەیوەندیدار بە یاسای نەوت و گاز گفتوگۆ كرا و گفتوگۆكانیش بەردەوامیان هەیە."
گوتەبێژی حكومەتی هەرێم بە ئاماژەپێدان بە پێداگریی حكومەتی هەرێم بۆ ڕێككەوتن لەگەڵ بەغدا، گوتی: "شاندی حكومەتی هەرێم بۆ تاووتوێكردنی پرسی پڕۆژەیاسای بودجەی فیدراڵ لەگەڵ تیمی حكومەتی عێراق كۆبووەوە و بڕیارە تیمێكی یاسایی بۆ تەواوكردنی داڕشتنی دەقە یاسایییەكان تایبەت بە پڕۆژەیاسای بودجە و یاسای نەوت و گاز، لەم دوو ڕۆژەدا سەردانی بەغدا بكات.
هەروەها د. ئومێد سەباح ،سەرۆكی دیوانی ئەنجوومەنی وەزیرانی هەرێمی كوردستان بەیانی ئەمڕۆ سێشەممە21ی2ی2023" لە هەژماری تایبەت بەخۆی لەتۆڕی كۆمەڵایەتی فەیس بووك بڵاویكردەوە: پاش سەردانێكی دوو رۆژە بۆ بەغدا وەك شاندی حكومەتی هەرێمی كوردستان ، گەڕاینەوە هەولێر" لەم سەردانەدا لەگەڵ وەزارەتی نەوتی عیراق دەربارەی یاسای نەوت و غاز و هەروەها لەگەڵ لایەنی پەیوەندیدار دەربارەی یاسای بودجە ، كۆبووینەوە.