ئه‌ندامێكی ره‌وتی سه‌در هه‌موو ئه‌و ده‌نگۆیانه‌ی ڕه‌ت كرده‌وه كه له‌باره‌ی نزیكبوونه‌وه و باشبوونی په‌یوه‌ندییه‌كانی نێوان ڕێبه‌ری ڕه‌وته‌كه‌ی له‌گه‌ڵ سه‌رۆكی هاوپه‌یمانی ده‌وڵه‌تی یاسا بڵاو ده‌كرێنه‌وه.
ئه‌حمه‌د ره‌بیعی كه ئه‌ندامێكی ره‌وتی سه‌دره له تویتێكدا ڕایگه‌یاند: تا ئێستا هیچ هه‌وڵێكی نزیكبوونه‌وه و كۆبوونه‌وه و پڕۆسه‌ی ئاشته‌وایی له‌نێوان موقته‌دا سه‌در ڕێبه‌ری ڕه‌وتی سه‌در و نووری مالیكی سه‌رۆكی هاوپه‌یمانی ده‌وڵه‌تی یاسا بوونی نییه.
ڕاشیگه‌یاند: ئه‌و ده‌نگۆیانه‌ی سه‌باره‌ت به نزیكبوونه‌وه‌ی نێوان موقته‌دا سه‌در و نووری مالیكی بڵاو ده‌كرێنه‌وه دوورن له ڕاستییه‌وه و بوونیان نییه.
ئه‌مه له‌كاتێكدایه كه هه‌ر ئه‌مڕۆ سێشه‌م، نووری مالیكی سه‌رۆكی هاوپه‌یمانی ده‌وڵه‌تی یاسا له چاوپێكه‌وتنێكی ته‌له‌فزیۆنیدا ڕایگه‌یاندبوو كه ئێستا په‌یوه‌ندییه‌كی باشیان له‌گه‌ڵ ڕه‌وتی سه‌در هه‌یه، هیواشی خواست كێشه و ناكۆكییه‌كانی نێوانیان كۆتایی پێ بێت و به‌ره‌و چاره‌سه‌ری بچن.
جه‌ختیشی كردبووه‌وه كه به‌مزووانه كۆتایی به كێشه و ناكۆكییه‌كانی له‌گه‌ڵ ڕه‌وتی سه‌در ده‌هێنن.
کۆمێنت (0)
تا ئێستا هیچ کۆمێنتێک نەکراوە.