ئه‌مڕۆ چوارشه‌م لە شاری مەدریدی پایته‌ختی ئیسپانیا، کۆنفرانسی بازرگانی هەرێمی کوردستان – ئیسپانیا له‌نێوان شاندی وەزارەتی بازرگانی و پیشەسازی حكوومه‌تی هه‌رێمی كوردستان و ژووری بازرگانی ئیسپانیا به‌ڕێوه‌چوو.
له كۆنفڕانسه‌كه‌دا بێجگە لە بەرپرسانی باڵای حکوومەتی ئیسپانیا لە بواری بازرگانی و پیشەسازی، نوێنەرانی 7 گرووپی کۆمپانیا گەورەکانی ئیسپانیا وه‌ك کۆمپانیای هێڵی شەمەندەفەر و دەرمانسازی و تەکنەلۆجیای گەیاندن و کەرەستەی جلوبەرگ و بیناسازی و تەکنەلۆجیای سەردەم ئامادە بوون.
لە میانەی کۆنفرانسەکەدا ئەندامانی شاندی وەزارەتی بازرگانی و پیشەسازی حكوومه‌تی هەرێمی كوردستان هاڵسان بە پێشکەشکردنی راپۆرتێك له‌سه‌ر دۆخی ئابووری کوردستان و دەرفەتەکان و گرینگی دروستکردنی پردێکی هەماهەنگی و گواستنەوەی ئەزموونی ئیسپانیا بۆ هەرێمی كوردستان.
لای خۆشییانه‌وه بەشداربووانی ئیسپانی بە گرینگیەوە ئامادەیی خۆیان نیشان دا بۆ کاری هاوبەش و بەشداریان لە چالاکی پیشانگاکان له هه‌رێمی كوردستان.
بڕیاره کۆنفرانسی بازرگانی هەرێمی کوردستان – ئیسپانیا ماوه‌ی دوو ڕۆژ بخایەنێت و تێیدا تەوەری گرینگ و تایبەت بە پرسی پێشخستنی پەیوەندییە بازرگانییەکانی نێوان هه‌رێمی كوردستان و ئیسپانیا تاوتوێ بکرێت.
کۆمێنت (0)
تا ئێستا هیچ کۆمێنتێک نەکراوە.