سەرۆكی حكومەت پێشوازی لە شاندێكی ئەنجومەنی پیرانی ئەمەریكا دەكات

ئەمڕۆ پێنجشەممە 2/23 مەسرور بارزانی سەرۆكی حكومەتی هەرێمی كوردستان، پێشوازی لە شاندێكی ئەنجومەنی پیرانی ئەمەریكا كرد. 
لە كۆبوونەوەكەدا،پەرەپێدانی پەیوەندییەكانی هەرێمی كوردستان لەگەڵ ئەمەریكا و گرنگیی چارەسەركردنی كێشەكانی هەرێم و حكومەتی فیدراڵ لە سەر بنەمای دەستوور تاوتوێ كرا.
تەوەرێكی سەرەكی كۆبوونەوەكە، تایبەت بوو بە چاكسازییەكانی كابینەی نۆیەم ، بە تایبەتی چاكسازییەكانی وەزارەتی پێشمەرگە و هەمەجۆركردنی سەرچاوەكانی داهات و بەدیجیتەڵكردنی خزمەتگوزارییە گشتییەكان و برەودان بە كەرتی كشتوكاڵ و هەناردەكردنی بەروبوومی ناوخۆیی بۆ بازاڕەكانی دەرەوە. 
لە بەشێكی دیكەی كۆبوونەوەكەدا، گفتوگۆ لە بارەی گرنگیی ئەنجامدانی هەڵبژاردنی پەرلەمانی كوردستان كرا. سەرۆكی حكومەت دووپاتی كردەوە، كە هیچ بیانوویەك نییە بۆ ئەوەی چیتر پرۆسەی هەڵبژاردن دوابخرێت و دەبێت لەم ساڵەدا بكرێت ، حكومەتی هەرێمی كوردستانیش، هەموو ئاسانكاری و ئامادەكارییەك بۆ ئەنجامدانی هەڵبژاردن دەكات.