لە هەولێر سێزدەمین فێستیڤاڵی ئازادی و نەورۆز دەستپێدەکات

لە هەولێر 13ـەمین فێستیڤاڵی ئازادی و نەورۆز لە 11ـی ئادار دەستپێدەکات، تاوەکوو ئێوارەى نەورۆز بەردەوام دەبێت.

ئێوارەى ئەمرۆ شەممە 25ـی 02ـی 2023، کۆبوونەوەیەک لە دیوانی پارێزگای هەولێر بەسەرپەرشتی ئومێد خۆشناو پارێزگاری هەولێر، بە مەبەستى ئامادەکارى بۆ ئەنجامدانى (13)ـەمین فێستیڤاڵی ئازادی و نەورۆز و بەرزڕاگرتنى یادەکانى ڕێككەوتننامەی 11ـی ئادار و ڕاپەرین و ڕزگاركردنی شاری هەولێر، ئەنجام درا.

ڕاگەیاندنی پارێزگای هەولێر لەبارەی کۆبوونەوەکە ڕایگەیاند: گفتوگۆ لە بارەى ئامادەکارییەکان بۆ ئەنجامدانى (13)ـەمین فێستیڤاڵی ئازادی و نەورۆز کرا، بۆ ئەو مەبەستەش لێژنەى باڵاى فێستیڤاڵ و چەند لێژنەیەکى دیکە دیاریکران بۆ بەرێوەبردنى ڕۆژانى فێستیڤاڵ کە لە ڕۆژى11ـی ئادارى ئەمساڵ بۆ بەرزڕاگرتنى یادی ڕێككەوتننامەی 11ـی ئادار و ڕزگاركردنی شاری هەولێر و ڕاپەڕین دەستپێدەکات و تاوەکوو ئێوارەى نەورۆز 20ـی ئادار بەردەوام دەبێت.

ڕاشیگەیاند: لەو ماوەیەدا زۆرترین چالاكی هونەرى جۆراوجۆر لەلایەن هونەرمەندانەوە بە هەماهەنگى بەڕێوەبەرایەتى گشتیى ڕۆشنبیرى و هونەرى هەولێر لە چەندین شوێنى هەولێرى پایتەخت، وەک قەڵاى هەولێر، پاركی شانەدەر، چەندین شوێنی دیکە پێشکەش دەکرێت.

جێگەى باسە، ساڵانە بەبۆنەى یادەکانى ڕێككەوتنامەى 11ـی ئادار کە لە ساڵى 1975 و 11ـی ئاداری ساڵی 1991ـی ڕاپەڕینى جەماوەری شاری هەولێر، لەلایەن پارێزگاى هەولێر فیستیڤاڵی ئازادی و نەورۆز بۆ ماوەى 10 ڕۆژ ساز دەکرێت.