گەشتکردن لە قوتابییان قەدەغە کرا

بەڕێوەبەری خوێندنی کوردی لە کەرکووک ڕایگەیاند، ڕەزامەندی بۆ هیچ جۆرە گەشتێکی قوتابییان بۆ دەرەوەی شاری کەرکووک نادرێت، تەنانەت لە ڕۆژانی پشووش.

شێرزاد ڕەشید بەڕێوەبەری خوێندنی کوردی لە کەرکووک ڕایگەیاند: ئاگاداری کارگێڕی هەموو قوتابخانەکانی خوێندنی کوردی دەکەینەوە کە هەموو جۆرە گەشتێک بۆ قوتابییان و بۆ دەرەوەی شاری کەرکووک قەدەغەیە و ڕێپێدراو نییە، بەپێچەوانەوە ڕێوشوێنی یاسایی توند لەبەرامبەر کارگێڕی ئەو قوتابخانانە دەگرینەبەر کە سەرپێچی ئەم ڕێنماییە بکەن.

ڕاشیگەیاند: داواتان لێدەکەین کە لە داهاتوودا هیچ داواکاریەکمان پێشکەش مەکەن بۆ وەرگرتنی ڕەزامەندی بۆ ئەنجامدانی گەشت بۆ قوتابییەکانتان.

هەر لەو ئاگادارییەدا، بەڕێوەبەری خوێندنی کوردی لە کەرکووک ئاگاداری دایکان و باوکانی قوتابییان دەکاتەوە کە "نەهێڵن هیچ گرووپ و ڕێکخراوێک گەشت ساز بدەن بۆ جگەرگۆشەکانتان لە دەرەوەی قوتابخانە یاخود لە ڕۆژانی هەینی و شەممووان کە ڕۆژانی پشووی قوتابخانەیە، چونکە خوانەخواستە هەر ڕووداو و کارەساتێکی نەخوازراو ڕووبدات ئێمە وەکوو پەروەردەی خوێندنی کوردی لێی بەرپرسیارنین".