سەرۆکایەتی شارەوانی چۆمان ڕایگه‌یاند كه توانیان گرفتی کۆکردنەوەی زبڵ و خاشاکی شارۆچكه‌كه‌یان چارەسەر بكه‌ن، ئه‌مه دوای ئه‌وه‌ی بەهۆی دروستبوونی گرفت لەسەر شوێنی کۆکردنەوە بۆ ماوەی 10 ڕۆژ بوو نەتوانرابوو زبڵ و خاشاکی ناو سەنتەری شارۆچكه‌كه هەڵبگیرێتەوە.
سەرۆکایەتی شارەوانی چۆمان ڕایگه‌یاند: دوای هەوڵی زۆر و بەردەوام بۆ ئەوەی بتوانین شوێنێک لە دەڤەرەکەمان دیاری بکەین بۆ ئەوەی زبڵ و خاشاکی سنووری شارەوانیمانی لێ کۆبکرێتەوە، دواتر بار بکرێتەوە یان ئەگەر لە شوێنێکی گونجاو بێت ژێرگڵ بکرێت وە چەندین شوێنی گونجاو دیاری کرا، بەڵام بەهۆی ناڕەزایی و ڕێگریی هاووڵاتییان نەتوانرا زبڵ و خاشاک کۆ بکرێتەوە.
ڕاشیگه‌یاند: بەو هۆیەوە ژینگەی ناوچەکەمان و تەندروستیی هاووڵاتییان لە بارودۆخێکی خراپدا بوو، بەڵام بەهۆی ئەوەی حکوومەتی هەرێمی کوردستان پارێزەری خەڵکە و دەیەوێت بە باشترین شێوە خزمەت بە هاووڵاتییان بکات، هیچ کاردانەوەیەکی توندی نەبوو بەرامبەر هەر هەڵسوکەوت و کارێکی نەشیاو کە کرابێت، بەڵکو بە پێچەوانەوە لە هەوڵی بەردەوامدا بووین بۆ ئەوەی چارەسەری ئەو گرفتە بکەین.
هه‌روه‌ها ڕایگه‌یاند: دواجار پارچە زەوییەکمان لە سنووری شاروانیمان دیاری کرد بۆ ئەوەی ڕۆژانە دوای کۆکردنەوەی زبڵ و خاشاک ڕاستەوخۆ بار بکرێتەوە و بە بارهەڵگر بگوازرێتەوە بۆ شوێنی زبڵ و خاشاکی سۆران.
شارەوانی چۆمان ئاماژه‌ی به‌وه‌ش دا كه هەر ئەمڕۆ کۆمپانیای پاپا گرووپ لە هەڵمەتێکی بەرفراواندا توانی زیاتر له 122 ته‌ن زبڵ و خاشاک کۆ بکرێتەوە، دواتریش گواسترایەوە و 13 تەنی دیکەش لەنێو بارهەڵگرەکاندایە سبەی دەگوزاریتەوە.
کۆمێنت (0)
تا ئێستا هیچ کۆمێنتێک نەکراوە.