ئه‌مڕۆ دووشه‌م باره‌گای بارزانی ڕاگه‌یه‌نراوێكی سه‌باره‌ت به یادكردنه‌وه‌ی ڕاپه‌ڕین بڵاو كرده‌وه و تێیدا ڕایگه‌یاند كه جێگەی داخێكی زۆرە لەم یاده‌دا حزب و لایەنە سیاسییەكان و لایەنگرانیان هەوڵی ئەوە دەدەن كە ئەو یادە بە حزبی بكەن.
باره‌گای بارزانی ڕاشیگه‌یاند "جێگەی داخێكی زۆرە لەیادی ڕاپەڕیندا حزب و لایەنە سیاسییەكان و لایەنگرانیان هەوڵی ئەوە دەدەن كە ئەو یادە بە حزبی بكەن و هەریەكە و بە جۆرێك لە جۆرەكان خۆی بە خاوەن و ئەنجامدەری ڕاپەڕین لە قەڵەم بدات".
هه‌روه‌ها ڕایگه‌یاند "ڕاپەڕین دەرئەنجامی یەكڕیزی و تێكۆشانی هەمەلایەنەی جەماوەر و لایەنەكانی ناو بەرەی كوردستانی و پێشمەرگە و ڕێكخستنە نهێنییەكان و سەرجەم چین و توێژە جیاجیاكانی كوردستان و درێژكراوەی خەباتێكی دوورودرێژ و بەردەوامی گەلی كوردستان بوو.
ئاماژه‌ی به‌وه‌ش دا كه پەیام و ئامانجەكانی ڕاپەڕین بەرز و گرانبەها و نیشتیمانی و نەتەوەیین و نابێ بە حزبی و بچووك بكرێنەوە و لە مانا و جەوهەر بەتاڵ بكرێن.
باره‌گای بارزانی له كۆتایی ڕاگه‌یه‌نراوكه‌دا جه‌ختیشی كرده‌وه كه ڕاپەڕین بە ڕەنج و ماندووبوون و هەوڵی هەموو لایەك سەركەوت، بۆیە خاوەن و ئەنجامدەری ڕاستەقینەی ئەو ڕووداوە مەزنە، كوردستانە بە هەموو حزب و لایەن و كەسایەتی و هاووڵاتییانییەوە.
کۆمێنت (0)
تا ئێستا هیچ کۆمێنتێک نەکراوە.