وەزیری بەرگری ئەمریکا لە کۆبوونەوەی لەگەڵ سەرۆکی هەرێمی کوردستان، پشتگیری ئەمریکای بۆ هەرێمی کوردستان دووپات کردەوە.
پاشنيوه‌ڕۆى ئه‌مڕۆ سێشه‌ممه 07ـی 03ـی 2023 نێچيرڤان بارزانى، سه‌رۆكى هه‌رێمى كوردستان، پێشوازى له لۆيد ئۆستن وه‌زيرى به‌رگريى ئه‌مريكا و شاندێكى ياوه‌رى كرد و سەرۆکایەتی هەرێمی کوردستان ناوەڕۆکی کۆبوونەوەکەی خستەڕوو و ڕایگەیاند: له كۆبوونه‌وه‌يه‌كدا كه جێگرانى سه‌رۆکی هەرێمی کوردستان و به‌رپرسانى باڵاى وه‌زاره‌تى پێشمه‌رگه ئاماده‌ى بوون، په‌يوه‌ندييه‌كانى ئه‌مريكا له‌گه‌ڵ عێراق و هه‌رێمى كوردستان، دۆخى ئه‌منى و دوايين پێشهاته‌كانى شه‌ڕى دژى تيرۆر، كێشه‌كانى هه‌ولێر ـ به‌غدا، دۆخى ناوخۆى هه‌رێمى كوردستان و هه‌ماهه‌نگيى پێشمه‌رگه و سوپاى عێراق بۆ به‌ره‌نگاربوونه‌وه‌ى داعش، تاوتوێ كران.
ڕاشیگەیاند: وه‌زيرى به‌رگريى به‌رده‌واميى وێڕاى ستايش و پێزانين بۆ ڕۆڵى پێشمه‌رگه له تێكشاندنى داعشدا، پشتگيريى وڵاته‌كه‌ى بۆ عێراق و هه‌رێمى كوردستان دووپات كرده‌وه و ئاماژه‌ى به‌وه دا كه به بايه‌خه‌وه له پرۆسه‌ى چاكسازى و ڕێكخستنه‌وه‌ى پێشمه‌رگه ده‌ڕوانن و هه‌موو هاوكارييه‌كى پێويست بۆ سه‌رخستنى پرۆسه‌كه پێشكه‌ش ده‌كه‌ن له چوارچێوه‌ى ياداشتى لێكگه‌يشتنى پێنتاگۆن له‌گه‌ڵ وه‌زاره‌تى پێشمه‌رگه.
ئەوەشی خستووەتەڕوو کە "هه‌ردوولا هاوڕا بوون كه تيرۆر و داعش هێشتا مه‌ترسين و هه‌ڕه‌شه‌ى ڕاسته‌قينه‌ن له عێراق و سووريا و بۆ به‌ره‌نگاربوونه‌وه‌يان و نه‌هێشتنى يه‌كجاره‌كييان، عێراق و هه‌رێمى كوردستان، هێشتا پێويستييان به پشتگيريى ئه‌مريكا و هاوپه‌يمانيى نێوده‌وڵه‌تييه. هه‌روه‌ها هاوڕا بوون له‌سه‌ر گرنگيى كارى پێكه‌وه‌يى و هاوبه‌ش له ناوچه‌كه بۆ پاراستنى ئارامى و سه‌قامگيرى."
هەر لە ڕاگەیەنراوی کۆبوونەوەکە باس لەوەش کراوە کە "نێچيرڤان بارزانى، سوپاس و پێزانينى هه‌رێمى كوردستانى بۆ هه‌موو هاوكارى و پشتگيرييه‌كانى ئه‌مه‌ريكا بۆ هه‌رێمى كوردستان و ڕۆڵى تيمه سه‌ربازييه‌كانى ئه‌مريكا له پرۆسه‌ى ڕێكخستنه‌وه‌ى پێشمه‌رگه ده‌ربڕى، هه‌روه‌ها دووپاتى كرده‌وه كه وێڕاى ته‌گه‌ره‌كانيش، پرۆسه‌ى چاكسازى و ڕێكخستنه‌ى پێشمه‌رگه سه‌رده‌خه‌ن."
ئەوەش هاتووە کە "وه‌زيرى به‌رگريى ئه‌مريكا پشتگيريى وڵاته‌كه‌ى بۆ گفتوگۆى چاره‌سه‌ركردنى كێشه‌كانى هه‌ولێر ـ به‌غدا نيشان دا و لايه‌نه سياسييه‌كانى هه‌رێمى كوردستانى هان دا بۆ يه‌كڕيزى و چاره‌سه‌ركردنى كێشه‌كانيان."
سەرۆکایەتی هەرێمی کوردستان ئاماژەی بەوەش داوە کە "په‌یوه‌ندييه‌كانى عێراق و هه‌رێمى كوردستان له‌گه‌ڵ وڵاتانى دراوسێ، تاوتوێكردنى دوايين پێشهاته‌كانى ناوچه‌كه به‌گشتى و چه‌ند پرسێكى جێى بايه‌خى هاوبه‌ش، ته‌وه‌رێكى ديكه‌ى كۆبوونه‌وه‌كه بوو."
جێی باسە، دواى كۆبوونه‌وه‌كه‌ش نێچيرڤان بارزانى و وه‌زيرى به‌رگريى ئه‌مه‌ريكا لەباره‌ى ناوه‌ڕۆكى كۆبوونه‌وه‌كه، لێدوانى ڕۆژنامه‌نييان دا.
کۆمێنت (0)
تا ئێستا هیچ کۆمێنتێک نەکراوە.