له میانه‌ی كۆبوونه‌وه‌یه‌كدا له‌گه‌ڵ شاندێكی بانكی نێوده‌وڵه‌تی، وه‌زیری دارایی و ئابووری ئاشكرای كرد كه دروستكردنی بانكی نیشتمان له هه‌رێمی كوردستان له قۆناغی كۆتایی دایه.
ئه‌مڕۆ سێشه‌م ئاوات جەناب نووری وەزیری دارایی و ئابووری پێشوازی کرد لە شاندێكی بانکی نێودەوڵەتی لە ڕۆژهەڵاتی ناوەڕاست و باکوری ئەفریقیا بە سەرۆکایەتی جۆن کریستۆڤەر کارێ بەڕێوەبەری هەرێمی ڕۆژهەڵاتی ناوەڕاست و باکوری ئەفریقیای بانکی نێودەوڵەتی.
له دیداره‌كه‌دا ئاوات جه‌ناب نووری کورتەیەکی لە سەر کار و چالاکییەکانی وەزارەت لە بواری بەدیجیتاڵکردنی سیستەمی بانکەکان و دابەشکردنی مووچەی خانەنشینان و فەرمانبەران بە شێوەی ئەلیکترۆنی و ڕێکخستنەوەی سیستەمی خەرجی بەشێوازی ئۆنلاین و زیادکردنی شەفافییەت و کەمکردنەوەی ڕۆتین پێشکەش کرد.
شاندی میوانیش ستایشی هەنگاوەکانی وەزارەتی داراییان کرد لە بواری شەفافییەت و بەدیجیتاڵکردنی خزمەتگوزارییەکان و داوایان کرد پەیوەندی ڕاستەوخۆیان هەبێت لە گەڵ وەزارەتی دارایی بە مەبەستی هەماهەنگی و هاوکاری لە بواری پێشکەشکردنی خزمەتگوزاری بانکی و دارایی و بەرزکردنەوەی توانای ستاف و کارمەندەکانی وەزارەت لە بوارە جیاجیاکاندا.
وەزیری دارایی ڕاشیگەیاند كه هەنگاوەکانی دروستکردنی بانکی نیشتمان وەک لقێکی بانکی ناوەندی لە هەرێمی کورستان لە قۆناغی کۆتاییدایە و بەکردنەوەی ئەو بانکە سیستەمی بانکی لە هەرێمی کوردستان قۆناغێکی باش دەچێتە پێشەوە.
ئامادەیی ستافی وەزارەت و هەموو بەڕێوبەرایەتیەکانی دەربڕی بۆ هاوکاری و هەماهەنگی بەردەوام لەگەڵ ستافی بانکی نێودەوڵەتی بۆ کاری پێکەوەیی و زیادبوونی شەفافییەت و بەرەوپێشبردنی سیستەمی و بانکی و دارایی لە هەرێمی کوردستان.
کۆمێنت (0)
تا ئێستا هیچ کۆمێنتێک نەکراوە.