وه‌زیری به‌رگریی ئه‌مه‌ریكا تویتێكی له‌سه‌ر سه‌ردانه‌كه‌ی ئه‌مڕۆی هه‌ولێر و كۆبوونه‌وه‌ی له‌گه‌ڵ سه‌رۆكی هه‌رێمی كوردستان بڵاو كرده‌وه و تێیدا جه‌ختی كرده‌وه كه له پشتیوانی و هاوكاریكردنی پێشمه‌رگه و هێزه ئه‌منییه‌كانی عێراق به‌رده‌وام ده‌بن.
لۆید ئۆستن وه‌زیری به‌رگریی ئه‌مه‌ریكا له تویته‌كه‌دا ڕایگه‌یاند: ئه‌مڕۆ له‌گه‌ڵ نێچیرڤان بارزانی سه‌رۆكی هه‌رێمی كوردستان كۆبوومه‌وه بۆ دووپاتكردنه‌وه له هاوبه‌شی نێوان ئه‌مه‌ریكا و حكوومه‌تی هه‌رێمی كوردستان.
ئۆستن ڕاشیگه‌یاند: وه‌زاره‌تی به‌رگریی ئه‌مه‌ریكا پابه‌نده به ڕاوێژكاری و هاوكاری و پشتیوانی وه‌زاره‌تی پێشمه‌رگه‌ی حكوومه‌تی هه‌رێمی كوردستان و هێزه ئه‌منییه‌كانی عێراق بۆ دڵنیابوون له له‌ناوبردنی یه‌كجاره‌كی ڕێكخراوی تیرۆریستی داعش له ناوچه‌كه.
ئه‌مڕۆ سێشه‌م لۆید ئۆستن وه‌زیری به‌رگریی ئه‌مه‌ریكا به سه‌ردانێكی فه‌رمی گه‌یشته عێراق و دواتریش سه‌ردانی هه‌رێمی كوردستانی كرد و له‌لایه‌ن نێچیرڤان بارزانی سه‌رۆكی هه‌رێمی كوردستان پێشوازی لێ كرا.
له دوای كۆبوونه‌وه‌كه سه‌رۆكی هه‌رێمی كوردستان له كۆنگره‌یه‌كی رۆژنامه‌وانی هاوبه‌شدا گوتی "بێگومان هاتنی لۆيد ئۆستن په‌يامێكى گرنگ و ڕوونى دڵنياكردنه‌وه و پشتگيريى ئه‌مه‌ريكايه له هه‌رێمى كوردستان و عێراق".
گوتیشی "كۆبوونه‌وه‌يه‌كى باشمان هه‌بوو، باسمان له په‌يوه‌ندييه‌كانى هه‌ردوولا له‌سه‌ر بنه‌ماى ڕێككه‌وتنى چوارچێوه‌ى ستراتيژيى عێراق و ئه‌مه‌ريكا كرد، جه‌ختیشمان له پێويستی به‌رده‌واميى هاريكاريى هاوبه‌ش و پشتگيريى ئه‌مه‌ريكا و هاوپه‌يمانانی نێوده‌وڵه‌تى بۆ عێراق و هه‌رێمى كوردستان كرده‌وه بۆ به‌ره‌نگاربوونه‌وه‌ى تيرۆر، هه‌روه‌ها باسمان له گرنگيى هاريكاريى پێشمه‌رگه و سوپاى عێراق كرد بۆ ڕووبه‌ڕووبوونه‌وه‌ى داعش".
Met today with @IKRPresident Nechirvan Barzani to reaffirm the partnership between the United States & the @Kurdistan Regional Government. @DeptofDefense is committed to advise, assist, & enable Iraqi Security Forces, including @KRG_MOPE, to ensure the enduring defeat of ISIS. pic.twitter.com/hgZ5tsDRNl
— Secretary of Defense Lloyd J. Austin III (@SecDef) March 7, 2023
کۆمێنت (0)
تا ئێستا هیچ کۆمێنتێک نەکراوە.