ئه‌مڕۆ چوارشه‌م له شاری هه‌ولێر هه‌ردوو به‌شی هه‌ڵبژاردنی پارتی دیموكراتی كوردستان و ده‌زگای هه‌ڵبژاردنی یه‌كێتی نیشتمانی كوردستان كۆبوونه‌وه‌یه‌كیان ئه‌نجام دا و دوای كۆبوونه‌وه‌كه‌ش ڕاگه‌یه‌نراوێكی هاوبه‌شیان بڵاو كرده‌وه و تێیدا هه‌ردوولا جه‌ختیان كرده‌وه كه له‌سه‌ر بابه‌تی هه‌ڵبژاردن لێكتێگه‌یشتنی ئه‌رێنی هاوبه‌شیان له‌نێواندا هه‌بوو.
له ڕاگه‌یه‌نراوه هاوبه‌شه‌كه‌ی نێوان به‌شی هه‌ڵبژاردنی پارتی و ده‌زگای هه‌ڵبژاردنی یه‌كێتیدا هاتووه "ئه‌مڕۆ چوارشه‌م 8/3/2023 له باره‌گای مه‌كته‌بی سیاسی یه‌كێتی نیشتمانی كوردستان له شاری هه‌ولێر هه‌ردوولا كۆبووینه‌وه".
هه‌روه‌ها هاتووه "له كۆبوونه‌وه‌یه‌كی ئه‌رێنیدا لێكتێگه‌یشتنی هاوبه‌ش هه‌بوو بۆ هه‌مواری یاسای هه‌ڵبژاردن و كاراكردنه‌وه‌ی كۆمیسیۆنی باڵای سه‌ربه‌خۆی هه‌ڵبژاردن و ڕاپرسی كوردستان".
بڵاویش كرایه‌وه "بۆ ئه‌م مه‌به‌سته نوێنه‌رانی هه‌ردوولا له په‌رله‌مانی كوردستان ده‌ست به هه‌نگاوه یاساییه‌كان ده‌كه‌ن به ڕه‌چاوكردنی و له‌به‌رچاوگرتنی بۆچوونی لایه‌نه سیاسییه‌كانی تر و هاوڕابوون له‌سه‌ر ئه‌وه‌ی پێكهاته‌كانی هه‌رێمی كوردستان خاوه‌ن ئیراده‌ی خۆیانن و پێویسته سه‌رنج و تێبینییه‌كانیان تایبه‌ت به كورسی كۆتاكان وه‌ربگیرێت.
کۆمێنت (0)
تا ئێستا هیچ کۆمێنتێک نەکراوە.