ئه‌مڕۆ پێنجشه‌م له شارۆچكه‌ی به‌رده‌ڕه‌ش پیاوێكی ته‌مه‌ن 65 ساڵ به‌هۆی ده‌رزی لێدانه‌وه له‌لایه‌ن نۆرینگه‌یه‌كی پزیشكی، گیانی له‌ده‌ست دا.
ڕووداوه‌كه دوای نیوه‌رۆی ئه‌مڕۆ پێنجشه‌م له به‌رده‌ڕه‌ش ڕوویداوه، كاتێك هاووڵاتییه‌ك به‌ناوی (محه‌مه‌د ئه‌مین) ته‌مه‌ن 65 ساڵ تووشی ته‌نگه‌نه‌فه‌سی ده‌بێت، له‌لایه‌ن كه‌سوكاره‌كه‌یه‌وه ده‌برێته لای نۆرینگه‌یه‌كی پزیشكی.
دوای ئه‌نجامدانێكی پشكنینێكی سه‌ره‌تایی، یاریده‌ری پزیشكه‌كه هه‌ر له نۆرینگه‌كه‌ی ده‌رزییه‌كی لێ ده‌دات و به‌هۆیه‌وه هاووڵاتییه‌كه گیانی له‌ده‌ست ده‌دات.
سه‌باره‌ت به ڕووداوه‌كه، عه‌مید سه‌عدی به‌رزنجی به‌ڕێوه‌به‌ری پۆلیسی به‌رده‌ڕه‌ش به (كوردستان تیڤی) جه‌ختی كرده‌وه كه له‌سه‌ر ڕووداوه‌كه یاریده‌ره پزیشكه‌كه ده‌ستگیركراوه، هه‌روه‌ها ته‌رمی پیاوه‌كه‌ش ڕه‌وانه‌ی پزیشكی دادی له پارێزگای دهۆك كراوه.
ئاماژه‌ی به‌وه‌ش دا كه ئێستا چاوه‌ڕێی ده‌رئه‌نجامی پزیشكی دادی دهۆك ده‌كه‌ن بۆ ئه‌وه‌ی ئه‌نجامی مردنی پیاوه‌كه ئاشكرا بكرێت.
به‌رده‌ڕه‌ش / سه‌نگه‌ر گۆران
کۆمێنت (0)
تا ئێستا هیچ کۆمێنتێک نەکراوە.