پارێزگاری هەولێر: ئامانجەكانی شۆڕش و ڕاپەرین دەکەین بە هەوێنی كارەكانمان

پارێزگاری هەولێر بە بۆنەی ساڵیادی ڕێكکەوتننامەی 11ـی ئادار و ساڵیادی ڕاپەڕین ڕایگەیاند، ئامانجەكانی شۆڕش و ڕاپەرین دەکەین بە هەوێنی كارەكانمان.

ئومێد خۆشناو پارێزگاری هەولێر ڕایگەیاند: وەکو پارێزگای هەولێر و سەرجەم یەکە کارگێڕی و ئیدارییەکانی، تەواوی هەوڵەکانمان دەخەینەگەڕ و كۆششی به‌رده‌وام دەکەین لە پێناوی خزمەتکردنی شارەکەمان و هاوڵاتییانی.

دەقی پەیامەکەی ئومێد خۆشناو پارێزگاری هەولێر:-

پەیامى پیرۆزبایی پارێزگارى هەولێر، بەبۆنەى ساڵیادی ڕێککەوتنامەى یازدەی ئازار و ڕزگاركردنی شارى هەولێر

بە ناوی خودای بەخشندە و میهرەبان

ئەمڕۆ (53) ساڵ بەسەر یەكەم ڕێككەوتنی نێوان گەلی كوردستان و حكومەتی عێراقیدا تێدەپەڕێ كە تێیدا دان بە بەشێك لە مافەكانی گەلی كوردستاندا نرا، بە مبۆنەیەوە و بە بۆنەى (32)ەمین ساڵیادی ڕاپەڕینی مەزن و شکۆداری گەلی کوردستان لە ئاداری 1991 و ڕزگارکردنی شارى هەولێر، گەرمترین پیرۆزبایی خۆمان ئاراستەی گشت کوردستانییان و پێشمەرگە قارەمانەکان و بنەماڵەی سەربەزری شەهیدان دەکەین.  

لەم دوو یادی پڕشکۆیەدا، دووپاتی ده‌كه‌ینه‌وه‌ وەکو پارێزگای هەولێر و سەرجەم یەکە کارگێڕی و ئیدارییەکانی، تەواوی هەوڵەکانمان دەخەینەگەڕ و كۆششی به‌رده‌وام دەکەین لە پێناوی خزمەتکردنی شارەکەمان و هاوڵاتییانی، دڵنیاش دەدەین ئامانجەكانی شۆڕش و ڕاپەرین دەکەین بە هەوێنی كارەكانمان لە پێناو ئاوەدانکردنەوە و گەشەپێدانی کوردستان و بە دیهێنانی ئاواتەكانی گەلەکەمان و دابینكرنی ژیانێكی شایستە و بەختەوەر بۆیان.

جارێکی تر بەرز و پیرۆز بێت ساڵیادی ڕێککەوتنامەى یازدەی ئازار  و ڕاپەڕین و ڕزگاركردنی شارى هەولێری پایتەختى ئاشتی و ئارامی و خۆشەویستی و پێکەوە ژیان.

هەزاران سڵاو بۆ شەهیدانی ڕاپەڕین و هەموو شەهیدانی ڕێگەی ڕزگاریی کوردستان