هێزەکانی سووریای دیموکرات ئاماژە بەوە دەدەن کە لە کەوتنەخوارەوەی دوو هێلیکۆپتەردا لە دهۆک، 9 چەکداریان کوژراون.
لە ڕاگەیەنراوێک هێزەکانی سووریای دیموکرات (هەسەدە) ڕایگەیاند: یەکەیەکی سەر بە یەکینەکانی تیرۆری سەر بە هێزەکانمان لە چوارچێوەی ڕووبەڕووبوونەوەی شانەکانی تیرۆریستانی داعش و بەمەبەستی ئاڵوگۆڕکردنی ئەزموونی ئەمنی و سەربازی بۆ بەرزبوونەوەی ئاستی شەڕ و ئاسایشی یەکەکان چوونە هەرێمی کوردستان.
ڕاشیگەیاند: لە کاتی چوونی ئەو یەکەیە بۆ شاری سلێمانی لە ئێوارەی ڕۆژی چوارشەممە 15ـی 03ـی 2023 دوو فڕۆکە بەهۆی خراپی کەشوهەوا کەوتنەخوارەوە و 9 لە چەکدارەکانیان کوژراون.
هەسەدە باسی لەوەش کردووە کە "هێزەکانی دژەتیرۆر لە شەڕی دژی تیرۆردا باشترین چەکدارەکانیان و فەرماندەکانی خۆیان کردە قوربانی و لە کۆبانێ ـەوە تاوەکوو ڕەقە و دێرەزوور شەڕی سەختیان کرد. ئەم هێزانە بە شێوازی پێشکەوتووی جەنگی مەشق و ڕاهێنانیان پێکراوە و هاوبەشی سەرەکی هاوپەیمانیی نێودەوڵەتیین لە شەڕی دژی داعش و چالاکانە کار دەکەن بۆ پەرەپێدانی تواناکانی شەڕ و تەکنیکی خۆیان و بەهێزکردنی میکانیزمەکانی کردەوەی هاوبەش لە ناوچەکە لەگەڵ هێزە جیاوازەکانی ڕووبەڕووبوونەوەی داعش".
لە ڕاگەیەنراوەکە هێزەکانی سووریای دیموکرات سەرەخۆشی لە کەسوکاری ئەو کوژراوانە دەکات و داوا لە لایەنە پەیوەندیدارەکانی هەرێمی کوردستان دەکات کە تەرمی چەکدارەکانیان بگەڕێننەوە بۆ کوردستانی سووریا.
کۆمێنت (0)
تا ئێستا هیچ کۆمێنتێک نەکراوە.