پارێزگاری دیوانییه بڕیاری دا سبه‌ی دووشه‌م له ته‌واوی داموده‌زگاكانی حكوومه‌ت پشووی فه‌رمی بێت به‌هۆی زۆری بارانبارین و دروستبوونی لافاوه‌وه.
ڕاگه‌یاندنی پارێزگای دیوانییه له به‌یاننامه‌یه‌كدا ڕایگه‌یاند: ئه‌مڕۆ یه‌كشه‌م مه‌یسه‌م عه‌بدولئیلا ئه‌لشه‌هد پارێزگاری دیوانییه بڕیاری دا سبه‌ی دووشه‌م له سه‌رجه‌م داموده‌زگاكانی حكوومه‌ت پشووی فه‌رمی بێت ته‌نیا فه‌رمانگه خزمه‌تگوزارییه‌كان نه‌بێت، ئه‌ویش به‌هۆی زۆری بارانبارین و خراپی كه‌شوهه‌وا و دروستبوونی لافاو له هه‌ندێ شوێنی پارێزگاكه.
ڕاشیگه‌یاند: پارێزگار هه‌روه‌ها فه‌رمانی ڕاسته‌وخۆی به ژووری عه‌مه‌لیاتی پارێزگا و سه‌رجه‌م فه‌رمانگه خزمه‌تگوزارییه‌كان كردووه خێرا بچن به‌ده‌م هانا و هاوكاری هاووڵاتییان و چاره‌سه‌ری كۆبوونه‌وه‌ی ئه‌و ئاوه بكه‌ن كه ئێستا له كۆڵان و شه‌قامه‌كانی پارێزگای دیوانییه كۆبووه‌ته‌وه.
جێی باسه دوای نیوه‌ڕۆی ئه‌مڕۆ یه‌كشه‌م بارانێكی زۆر و به‌خوڕ له به‌شێك له پارێزگاكانی عێراق به‌تایبه‌تیش له پارێزگای دیوانییه باریوه و به‌هۆیه‌وه گردبوونه‌وه‌ی ئاو و لافاو له هه‌ندێ گه‌ڕه‌ك و شه‌قام و كۆڵانی پارێزگاكه دروست بووه.
کۆمێنت (0)
تا ئێستا هیچ کۆمێنتێک نەکراوە.