مه‌كته‌بی سیاسی پارتی 64مین ساڵوه‌گه‌ری ده‌رچوونی رۆژنامه‌ی خه‌بات پیرۆز ده‌كات

مه‌كته‌بی سیاسی پارتی دیموكراتی كوردستان ئه‌مڕۆ سێشه‌م په‌یامێكی پیرۆزبایی به‌ بۆنه‌ی 64مین ساڵوه‌گه‌ری ده‌رچوونی رۆژنامه‌ی خه‌بات بڵاو كرده‌وه‌.

مه‌كته‌بی سیاسی پارتی له‌ په‌یامه‌كه‌دا ڕایگه‌یاند: ئەمڕۆ (٦٤)ەمین ساڵیادی دەرچوونی ڕۆژنامەی خەباتە، ئەو ڕۆژنامەیەی تەمەنێکی پڕ بەخششی لەپێناو دۆزی ڕەوای گەلەکەمان و گەشەپێدانی بواری ڕۆژنامەگەری تەرخان کرد.

ڕاشیگه‌یاند: ڕۆژنامەی خەبات وەک ڕۆژنامەی زمانحاڵی پارتیمان، ڕابردوویەکی شکۆداری تۆمار کردووە و لەنێو بزاڤی ڕزگاریخوازیی گەلەکەمان بە ڕابەرایەتی (بارزانیی نەمر) هەر لەدەستپێکی دەرچوونییەوە ڕۆڵێکی بوێر و کاریگەری هەبوو بۆ بەرجەستەکردنی ئامانجەکانی شۆڕش و جۆشدانی گیانی بەرخۆدان و نیشتیمانپەروەری.

ئه‌مه‌ی خواره‌وه‌ ده‌قی پەیامه‌ پیرۆزباییه‌كه‌ی مەکتەبی سیاسیی پارتی دیموکراتی کوردستانه‌ بە بۆنەی (64)ەمین ساڵوەگەڕی دەرچوونی ڕۆژنامەی خەبات:-

 هەڤاڵانی بەڕێز سەرنووسەر و ستافی نووسین و هونەری و کادیرانی ڕۆژنامەی خەبات.

ئەمڕۆ (64)ەمین ساڵیادی دەرچوونی ڕۆژنامەی خەباتە، ئەو ڕۆژنامەیەی تەمەنێکی پڕ بەخششی لەپێناو دۆزی ڕەوای گەلەکەمان و گەشەپێدانی بواری ڕۆژنامەگەری تەرخان کرد، بۆیە بە دەستکەوتێکی گرنگ و بەهاداری نێو بزاڤ و مێژووی ڕۆژنامەگەریی کوردیمان دادەنرێت.

ڕۆژنامەی خەبات، یەکەمین ڕۆژنامەی ڕۆژانەیە کە پرەنسیپ و ئیتیکە ڕاست و دروستەکانی ڕۆژنامەوانیی پەیڕەو کردووە و بە پێی نەخشەڕێگایەکی گونجاو و سەردەمییانە کارنامەی خۆی داڕشتووە و هەمیشە سەکۆیەکی دەوڵەمەندی نووسەران و ڕۆشنبیران و ڕۆژنامەوانان بووە بە بێ جیاوازی.

ڕۆژنامەی خەبات، وەک ڕۆژنامەی زمانحاڵی پارتیمان، ڕابردوویەکی شکۆداری تۆمار کردووە و لەنێو بزاڤی ڕزگاریخوازیی گەلەکەمان بە ڕابەرایەتی (بارزانیی نەمر) هەر لەدەستپێکی دەرچوونییەوە ڕۆڵێکی بوێر و کاریگەری هەبوو بۆ بەرجەستەکردنی ئامانجەکانی شۆڕش و جۆشدانی گیانی بەرخۆدان و نیشتیمانپەروەری.

مایەی شانازییە ڕۆژنامەی خەبات تا ئەمڕۆ توانیویەتی بەرپرسانە و لەخۆبردووانە لە ئاست ئەو پەیامە پیرۆزە و ئەو ئەرکە سەخت و گرنگەی بێت، هەم لە سەنگەری شەرەفمەندانەی ڕۆژنامەوانی و هەمیشه‌ لەڕیزی پێشەوەی بەرگریکردن لە ئازادی و دیموکراسی و پرسە چارەنووسسازەکان و بەرژەوەندییە باڵاکانی گەلەکەمان.

لە (64)ەمین ساڵوەگەڕی بە ئاشکرا دەرچوونی ڕۆژنامەی خەبات، پیرۆزبایی لە ئێوەی هێژا و خوێنەرانی ئازیزی ڕۆژنامەکە دەکەین، ئومێدەوارین لەنێو ئەو سەردەمە جەنجاڵەی تەکنەلۆجیا و پێشکەوتنی ئامراز و دەزگاکانی ڕاگەیاندن و پەیوەندیپێکردن، زیاتر لە هەموو ڕوویەکەوە بە پێی ئەو قۆناغە بەرەوپێش بچن و ڕۆڵ و کاریگەریی ڕۆژنامەکە بەهێزتر و بەربڵاوتر بکەن.

 بەو بۆنەیەوە جارێکی دیکە پاڵپشتیی خۆمان بۆ بەردەوامبوون و پەرەپێدانی ڕۆژنامەی خەبات دووپات دەکەینەوە و هەر سەرکەوتوو بن.

ـ سڵاو لە کەسایەتییە ماندوونەناس و پێشەنگەکانی ڕۆژنامەوانیی کوردیمان.

ـ سڵاو لەو سیمبولانەی ڕۆژنامەی خەبات ـ یان بەرز و شکۆدارانە گەیاندە ئەمڕۆ.

بەرز و پیرۆز بێت (64)ەمین ساڵیادی خەباتی نەسرەوتووی ڕۆژنامەی خەبات.

مەکتەبی سیاسیی

پارتی دیموکراتی کوردستان

4ـی 4ـی 2023