ئه‌مشه‌و هه‌ولێر تۆڵه‌ی خۆی له‌ نه‌فتی میسان كرده‌وه‌

ئه‌مشه‌و سێشه‌م یانه‌ی هه‌ولێر له‌ چوارچێوه‌ی ركابه‌رییه‌كانی خولی نایابی عێراق، سه‌ركه‌وتنێكی تری تۆمار كرد و به‌ 3 گۆڵ تۆڵه‌ی خۆی له‌ یانه‌ی نه‌فتی میسان كرده‌وه‌.

یارییه‌كه‌ له‌چوارچێوه‌ی ركابه‌رییه‌كانی گه‌ڕی 22ی خولی نایابی عێراق له‌نێو یاریگه‌ی فڕه‌نسۆ هه‌ریری له‌ شاری هه‌ولێر به‌ڕێوه‌ چوو.

تێیدا یانه‌ی هه‌ولێر له‌نێو یاریگه‌ و جه‌ماوه‌ره‌كه‌یدا به‌ ئه‌نجامی 3-1 گۆڵ له‌ یانه‌ی نه‌فتی میسانی برده‌وه‌، گۆڵه‌كانی یانه‌ی هه‌ولێر له‌لایه‌ن شێركۆ كه‌ریم 2 گۆڵ له‌ خوله‌كانی 37 و 87 و ئه‌مجه‌د رازی له‌ خوله‌كی 68 تۆمار كران.

ئه‌مه‌ له‌كاتێكدایه‌ كه‌ یانه‌ی هه‌ولێر پێشتر له‌ یاریی چووندا له‌ گه‌ڕی 3ی خولی نایابی عێراق به‌ ئه‌نجامی 1-2 گۆڵ به‌رامبه‌ر یانه‌ی نه‌فتی میسان شكستی خواردبوو.

یانه‌ی هه‌ولێر به‌ سه‌ركردایه‌تی ده‌سته‌ی راهێنه‌ره‌ نوێیه‌كانی، ئه‌مه‌ دووه‌م یارییه‌ له‌سه‌ر یه‌ك سه‌ركه‌وتن به‌ده‌ستدێنێ و له‌ یاریی ڕابردووشدا به‌ ئه‌نجامی 1-3 گۆڵ له‌ یانه‌ی كاره‌بای بردبووه‌وه‌.

به‌م سه‌ركه‌وتنه‌ یانه‌ی هه‌ولێر ژماره‌ی خاڵه‌كانی كرده‌ 28 خاڵ و هاته‌ ریزبه‌ندی 13ی یانه‌كانی خولی نایابی عێراق، یانه‌ی نه‌فتی میسانیش به‌ 32 خاڵ له‌ ریزبه‌ندی 7ی یانه‌كان مایه‌وه‌.