پارێزگاری هەولێر ئەمشەو سەردانی شوێنی ئاگرکەوتنەوەکەی بازاڕی شێخەڵڵای هەولێری کرد و ئاماژەی بەوە دا کە ئاگرەکە کۆنترۆڵ کراوە بەبێ ئەوەی هیچ زیانێکی گیانی لێبکەوێتەوە، بەهۆی ئاگرەکەش تەنیا عەرەبانەی کەلوپەلی کارەبایی، پلاستیک، سەوزە و میوەی سووتاون و هیچ دووکانێک نەسووتاوە.
دوای ئەوەی ئەمشەو چوارشەممە 05ـی 04ـی 2023، لە بازاڕی شێخەڵڵای هەولێر ئاگرێکی گەورە کەوتەوە و لە ئەنجامدا ژمارەیەک کەپر و عەرەبانەی کاسبکارنی بازاڕەکە سووتان، ئومێد خۆشناو، پارێزگاری هەولێر بە یاوەری نەبەز عەبدولحەمید، قائیمقامی ناوەند، هەر زوو سەردانی شوێنەکەی کرد و لەبارەی ئاگرەکە ڕاگەیاندنی پارێزگای هەولێر ڕایگەیاند: خۆشبەختانە لەلایەن تیمەکانی بەرگری شارستانی توانرا بە ماوەیەکی کەم ئاگرەکە کۆنترۆڵ بکرێت، بەبێ ئەوەی هیچ زیانێکی گیانی لێبکەوێتەوە.
ڕاشیگەیاند: پارێزگاری هەولێر، دوای بەسەرکردنەوەی شوێنەکە، لە نزیکەوە لە هۆکاری دروستبوونی ئاگرەکەی کۆڵییەوە کە بە هۆیەوە ژمارەیەک کەپر و عەرەبانەی کەلوپەلی کارەبایی، پلاستیک، سەوزە و میوەی کاسبکاران سووتان، بەڵام هیچ دووکانێک نەسووتاوە و لەئێستاشدا لێکۆڵینەوە لە هۆکاری دروستبوونی ئاگرەکە بەردەوامە.
بازاڕی شێخەڵڵای هەولێر دەکەوێتە سەنتەری شار و بازاڕێکی میللیە و هەموو جۆرە کاڵایەک، هەر لە خۆراک و کەرەستەی کارەبایی تاوەکو جلوبەرگ و سەوزە و میوەی تێدا دەفرۆشرێت.
کۆمێنت (0)
تا ئێستا هیچ کۆمێنتێک نەکراوە.