به‌ڕێوه‌به‌رایه‌تی هه‌واڵگریی سه‌ربازی ئه‌مڕۆ پێنجشه‌م ده‌ستگیركردنی 3 تیرۆریستی مه‌ترسیداری داعشی له سنووری پارێزگای كه‌ركووك ڕاگه‌یاند كه یه‌كێكیان كاری دابینكردنی ئازووقه و داوده‌رمان و كه‌لوپه‌ل بووه بۆ چه‌كدارانی داعش.
به‌ڕێوه‌به‌رایه‌تییه‌كه له ڕاگه‌یه‌نراوێكدا بڵاوی كرده‌وه: ئه‌مڕۆ پێنجشه‌م له ئۆپه‌ڕاسیۆنێكدا هێزه‌كانی فرقه‌ی 14ی هه‌واڵگریی سه‌ربازی به هه‌ماهه‌نگی له‌گه‌ڵ هێزه ئه‌منییه‌كانی تر له شاره‌دێی زاب توانیان 3 تیرۆریستی داعش ده‌ستگیر بكه‌ن.
بڵاویشی كرده‌وه: هه‌رسێ ده‌ستگیركراوه‌كه به مادده‌ی 4ی تیرۆر له دادگای شارۆچكه‌ی حه‌ویجه له سنووری پارێزگای كه‌ركووك داواكراو بوون.
ئاماژه‌ی به‌وه‌ش دا كه یه‌كێك له تیرۆریسته ده‌ستگیركراوه‌كان كاری دابینكردنی ئازووقه و داوده‌رمان و كه‌لوپه‌ل بوو بۆ ڕێكخراوی تیرۆریستی داعش، دووه‌میشیان ئه‌ركی ڕێكخستنی چاوپێكه‌وتن و كۆبوونه‌وه‌كانی داعشی پێ سپێردرابوو و ئه‌وه‌ی سێیه‌میشیان هاوكاری تیرۆریستانی تری كردبوو له تاڵانكردنی فه‌رمانگه‌كانی حكوومه‌ت پێش پڕۆسه‌ی ئازادكردنی ناوچه‌كه.
کۆمێنت (0)
تا ئێستا هیچ کۆمێنتێک نەکراوە.