کاتژمێر نۆی شه‌وی رابردوو، گەورەترین پێشانگای نێودەوڵەتی رەمەزان بۆ بازاڕکردن بە بەشداری 100 کۆمپانیا کرایەوە.
لە رێوڕەسمێکدا بە ئامادەبوونی پشتیوان سادق وەزیری ئەوقاف و کاروباری ئایینی ، ئومێد خۆشناو پارێزگاری ھەولێر ، سەرۆکی یەکێتی زانایانی ئایینی کوردستان و چەند بەرپرسی دیکەی حکوومی، پێشانگاکە له پاركی سامی عه‌بدولڕه‌حمان کرایەوە.
لە پێشانگا و فیستیڤاڵی نێودەوڵەتی رەمەزان بۆ بەبازاڕکردن، 100 کۆمپانیا لە حەوت وڵاتی جیاوازەوە بەشدارن کە بریتین لە میسڕ، تورکیا، ئێران، ئیمارات، ھیند، یۆنان و عێراق کە ماوەی 10رۆژ دەخایەنێت.
لە پێشانگاکەدا چەندین کۆمپانیای خۆماڵی کەلوپەلەکانیان تیادا نمایشکردووە بەشێک لەوانەش تایبەتن بە بەروبوومی خۆماڵی.
پێشانگاکە بە شەوانە دەکرێتەوە و کارگێڕی پێشانگاکەش لە میانی ئەو دە رۆژەدا پێشبینی ھاتنی دووسەد ھەزار سەردانیکار دەکات.
جیاواز لە پێشانگاکانی دیکە، بەھۆی مانگی پیرۆزی رەمەزانەوە، پێشانگاکە رۆژانە لە کاتژمێر ھەشتی شەو دەکرێتەوە و تا پارشێو بەردەوام دەبێت.
ھەر لە میانی بەڕێوەچوونی پێشانگاکە، چەندین چالاکیی ئاینی و کولتووری جۆراوجۆر تایبەت بەمانگی رەمەزان بەڕێوەدەچێت.
کۆمێنت (0)
تا ئێستا هیچ کۆمێنتێک نەکراوە.