دەستەی وەبەرهێنانی هەرێمی کوردستان سەبارەت بە وادەی دروستکردنی هێڵی ئاسنینی شەمەندەفەر لە هەرێمی کوردستان ڕوونکردنەوە دەدات و دەڵێت، ئەو بابەتە تەنیا پەیوەست نییە بەوانەوە.
لە ڕوونکردنەوەیەکدا دەستەی وەبەرهێنانی هەرێمی کوردستان ڕایگەیاند، ماوەیەکە لەلایەن ژمارەیەک لە ڕۆژنامەڤان و میدیاکاران و تەنانەت هاووڵاتییانەوەش پرسیاری ئەوەمان لێ دەکرێت، کە "کەی دەست بە دروستکردن و جێبەجێکردنی هێڵی شەمەندەفەر لە هەرێمی کوردستان دەکرێت؟"
لەمبارەیەوە دەستەی وەبەرهێنان دەڵێت: ئـەم پرسە تەنیا پەیوەندی بە دەستەی وەبەرھێنانەوە نییە، بەڵکـو زیاتر لە پسپۆراتی ھەردوو وەزارەتی ئاوەدانکردنەوە و نیشتەجێکردن و وەزارەتی گواستنەوە و گەیاندندایە، ئەوان زیاتر لایەنی پەیوەندیدار و جێبەجێکارن.
هەر لە ڕوونکردنەوەکەدا ئاماژەی بەوەش داوە کە دەستەی وەبەرهێنان وەک لایەنێکی حکوومی لەگەڵ کەرتی تایبەت هاوکار و هەماهەنگ دەبێت، بەو واتایەی ڕۆڵی دەستە کارئاسانیکردنە بۆ کۆمپانیاکان و وەبەرهێنەرانی بیانی بۆ ئەنجامدانی پڕۆژەکە.
کۆمێنت (0)
تا ئێستا هیچ کۆمێنتێک نەکراوە.