عێراق پشتگیری لە دەستپێشخەرییەكان بۆ كۆتاییهێنان بە قەیرانە مەترسیدارەكەی سوودان دەكات

ئەمڕۆ سێشەممە، فوئاد حسێن، وەزیری دەرەوەی عێراق ڕایگەیاند، عێراق پاڵپشتی دەستپێشخەرییەكانی كۆتاییهێنان بە قەیرانە مەترسیدارەكەی سوودان دەكات.
لەوبارەیەوە وتەبێژی وەزارەتەكە، ئەحمەد سەحاف لە بەیاننامەیەكدا ڕایگەیاندووە:لە چوارچێوەی كاری هاوبەش و هەماهەنگی لەگەڵ وڵاتان ، فوئاد حسێن ،جێگری سەرۆك وەزیران و وەزیری دەرەوە بەجیا پەیوەندی تەلەفۆنی لەگەڵ فەیسەڵ بن فەرحان ئال سعود، وەزیری دەرەوەی شانشینی سعودیە و عەبدوڵڵا بن زاید، وەزیری دەرەوەی میرنشینە یەكگرتووەكانی عەرەبی كردووە.
ئاماژەی بەوەدا كە پەیوەندییە تەلەفۆنییەكە تایبەت بوو بە گفتوگۆكردن لەسەر دۆخی سودان و شەڕی نێوان هەردوو لایەنی ململانێكان.
بەگوێرەی بەیاننامەكە فوئاد حوسێن ستایشی ڕۆڵی  ئەو دوو وڵاتەو وڵاتانی دیكەی كردووە لە هەوڵدان بۆ پاڵنانی لایەنەكانی ململانێ بۆ ئاگربەست و دەستپێكردنی گفتوگۆ.
ناوبراو ئاماژەی بەوەشكردووە  كە كارەكان بۆ گواستنەوەی عێراقییەكان لە ئاگری شەڕەكە بەردەوامن.