وه‌زاره‌تی ته‌ندروستی سوودان ئه‌مڕۆ چوارشه‌م دوایین ئاماری كوژراو و بریندارانی شه‌ڕ و پێكدادانه‌كانی وڵاته‌كه‌ی ڕاگه‌یاند كه كوشتن زیاتر له 500 كه‌سه و برینداریش زیاتر له 4 هه‌زار كه‌س.
وه‌زاره‌تی ته‌ندروستی سوودان ڕایگه‌یاند: تا شه‌وی ڕابردوو ژماره‌ی كوژراوانی شه‌ڕ و پێكدادانه‌كانی نێوان سوپای سوودان و هێزه‌كانی پشتیوانی خێرا 512 كه‌س بووه، ژماره‌ی بریندارانیش 4 هه‌زار و 193 كه‌س بوون.
ڕاشیگه‌یاند: ته‌نیا له سنووری شاری خه‌رتوومی پایته‌خت 169 كوژراو هه‌بووه له‌گه‌ڵ 2 هه‌زار و 403 بریندار.
هه‌روه‌ها ڕایگه‌یاند: داوامان له هه‌ردوو لایه‌نی شه‌ڕكه‌ر كردووه نه‌خۆشخانه و شوێنه ته‌ندروستییه‌كان نه‌كرێنه ئامانج و به‌هه‌موو شێوه‌یه‌كیش هاوكاری پێشكه‌ش به تیمه ته‌ندروستییه‌كان بكه‌ن بۆ گه‌یاندنی پێداویستی ته‌ندروستی و گواستنه‌وه‌ی برینداران.
وه‌زاره‌تی ته‌ندروستی سوودان نه‌شی شارده‌وه كه به‌هۆی شه‌ڕ و پێكدادانه‌كان ئێستا به‌شێكی زۆر له نه‌خۆشخانه‌كان داخراون. جه‌ختیشی كرده‌وه كه به‌رده‌وام له‌گه‌ڵ ڕێكخراوی ته‌ندروستی جیهانی و ڕێكخراوه نێوده‌وڵه‌تییه‌كانی تر له‌سه‌ر هێڵێن به مه‌به‌ستی پێشكه‌شكردنی هاوكاری و گه‌یشتنی داوده‌رمان.
کۆمێنت (0)
تا ئێستا هیچ کۆمێنتێک نەکراوە.