هۆشداری لە ئەگەری ڕوودانی شەڕێكی درێژخایەن و سەرتاسەری لە سوودان دەدرێت

نەتەوە یەكگرتووەكان لە ڕاپۆرتێكدا ترسی خۆی لە ئەگەری ڕوودانی شەڕێكی درێژخایەن و سەرتاسەری لە سودان دەربڕی، كە سنوورەكانی لەگەڵ 7 وڵاتدا هاوبەشە.
بەگوێرەی ڕاپۆرتی نەتەوە یەكگرتووەكان ،شەڕەكە لە ناوچەیەكدا ڕوودەدات كە نائەمنی و ناسەقامگیری سیاسی بەرەو خراپتر دەچێت و دۆخی مرۆیی بەرەو خراپتر دەچێت.
بەپێی هەواڵی نەتەوە یەكگرتووەكان، ئاستەنگەكانی بەردەم سودان زۆرن، لەوانە پێداویستی بەپەلەی مرۆیی و ئابووری، پێویستی دەستەبەركردنی ئاسایش، دەستەبەركردنی دادپەروەری، ڕێزگرتن لە مافەكانی مرۆڤ، هێنانەدی ئاشتی و پێشخستنی گواستنەوەی دیموكراسی.
شەڕ و پێكدادانەكانی ئەم دواییە بووەتە هۆی كەمیی خۆراك و ئاو و دەرمان و سووتەمەنی توند و هاوكات نرخی كەرەستەی سەرەتایی و ئامرازەكانی گواستنەوەش بەرزبووەتەوە.
لای خۆیەوە ئەمینداری گشتی نەتەوە یەكگرتووەكان، ئەنتۆنیۆ گۆتێرێس چەندین جار داوای لە لایەنەكان كردووە دەستبەجێ شەڕ و پێكدادانەكان ڕابگرن و ڕێگە بە چۆڵكردنی خەڵكی سڤیل لەو ناوچانە بدەن كە بەهۆی شەڕەكەوە زیانیان بەركەوتووە.
هەروەها گۆتێرێس هۆشداریدا لە ئەگەری ڕوودانی شەڕێكی درێژخایەن و سەرتاسەری لە سودان، كە سنوورەكانی لەگەڵ 7 وڵاتدا هاوبەشە، كە هەموویان لە ماوەی دەیەی ڕابردوودا شایەتی ململانێ یان نائارامی مەدەنی بوون.