قایمقامییه‌تی سلێمانی ئه‌مڕۆ شه‌موو كارگه‌یه‌كی دروستكردنی گه‌س و شاورمه‌ی له شاره‌كه داخست كه گۆشتی به‌ستووی ده‌كرده گه‌س و شاورمه و به نرخی گۆشتی فرێش ده‌یدا به خواردنه‌گه‌كان، هه‌روه‌ها خاوه‌نه‌كه‌شی مۆری مه‌رزی باشماخی ساخته كردبوو و گۆشته‌كه‌ی له بازاڕ ساغ ده‌كرده‌وه.
قایمقامییه‌تی سلێمانی بڵاوی كرده‌وه: ئەمڕۆ شەموو لەسەر زانیاری بەڕێوەبەرایەتی پۆلیسی سلێمانی/بنکەی سەرا، بەهۆی پابەندنەبوون بە مەرج و رێنماییەکانی کارکردن و ساغکردنەوەی گۆشتی بەستوو بە نرخی فرێش، کۆگا و ساردکەرەوە و کارگەی ئامادەکردنی گەس و شاورمەی (سانان)ی داخست.
بڵاویشی كرده‌وه: لە کاتی سەردانی لیژنەکە بۆ کارگە و بەڕادی سانان، دەرکەوتووە بڕێکی زۆر گۆشتی بەستووی هەیە و بە نرخی گۆشتی فرێش شاورمەی لێ دروست دەکات و بە دوکانەکانی خواردەمەنی خێرای دەفرۆشێت.
هه‌روه‌ها بڵاوی كرده‌وه: بڕی ئەو گۆشتە بەستووە قەدەغەکراوەی له‌لایه‌ن لیژنە هاوبەشەکانی قایمقامییەتی سلێمانی لە کۆگا و بەڕادەکەدا دەستی بەسەردا گیراوە زیاتر لە 2 تۆن و (750) کیلۆگرام، هه‌روه‌ها بە فەرمانی قایمقامی سلێمانی کارگەی سانان دادەخرێت تەواوی ئەو گۆشتەی دەستی بەسەردا گیراوە لەناو دەبرێت.
جه‌ختیشی كرده‌وه كه بە فەرمانی دادەوەری لێکۆڵینەوەی یەکی سلێمانی و لەلایەن بەڕێوەبەرایەتی ئاسایشی سلێمانییەوە بە تۆمەتی بەکارهێنانی مۆری ساختە، لە مەرزی باشماخ خاوەنی کۆگا و ساردکەرەوە و کارگەی ئامادەکردنی گەس و شاورمەی سانان کەمێک پێش ئێستا دەستگیر کراوە و رووبەڕووی رێکاری یاسایی دەکرێتەوە.
کۆمێنت (0)
تا ئێستا هیچ کۆمێنتێک نەکراوە.