گۆڕانکاریی لە نرخی بەنزین دەکرێت؛ وەزارەتی سامانە سرووشتییەکان دەڵێت، بۆ سەرجەم جۆری ئۆتۆمبێلەکانە و کوالێتیی بەنزینەکەش “بەرزە”
ئه‌مڕۆ یه‌كشه‌م 30ی4ی2023، وه‌زاره‌تی سامانه سروشتییه‌كانی حكوومه‌تی هه‌رێمی كوردستان بڵاویكرده‌وه: لەپێناو بەرژەوەندی گشتی و بۆ بەرزكردنەوەی كوالێتیی بەنزین و یەكخستنی نرخی بەنزین، لە یەکی ئایارەوە بۆ ماوەی یەك مانگ نرخی لیتری بەنزینی “جۆری نۆرماڵ” دەكرێته 750 دینار بۆ سەرجەم ئۆتۆمبێلەکانی تایبەت، تاکسی، پاس و پیکاب.
وەزارەتی سامانە سرووشتییەکان لەڕێگەی پاڵاوتگەكانی ناوخۆوە ئەم بەنزینە كوالێتییە بەرزە بەرهەمدەهێنێت و لێژنەکانی چاودێری و بەدواداچوون لە بەڕێوەبەرایەتیی نەوت و کانزاکان لە پارێزگاكان و ئیدارە سەربەخۆكان بەهەمان میكانیزمی پێشوو، چاودێری بەدواداچوونی كوالێتیی بەنزین دەكەن، بەپێی ئەو خەسڵەتەی پەسەندكراوە لە وەزارەت بۆ هەموو بەرهەمێكی بەنزین.
لەبارەی ئەم بابەتەوە، ڕێبین زەنگەنە، بەڕێوەبەری گشتیی کارگێڕی و داراییی وەزارەتی سامانە سرووشتییەکان، بۆ فەرمانگەی میدیا و زانیاری قسەی کرد و ڕایگەیاند: بڕیارەکە بە ڕەچاوکردنی دۆخی هاووڵاتییان دراوە و بۆ ماوەی مانگێک بەردەوام دەبێت.
ئەو بەڕێوەبەرەی وەزارەتی سامانە سرووشتییەکان، زانیاریی زیاتری باس کرد و گوتی: بەنزینەکە بە شێوەیەکی ستاندارد لە ناوخۆ بەرهەم دەهێنرێت و بۆ پاراستنی کوالێتییەکەی، لیژنەکانی چاودێریی پارێزگا و ئیدارە سەربەخۆکان چاودێریی بەنزینخانەکان دەکەن.
بڕیارە دوای تەواوبوونی ئەو وادەیەی کە بۆ یەکخستنی نرخی بەنزین دیاری کراوە، دووبارە پێداچوونەوەی پێدا دەکرێت.
دارشتنه‌وه‌ی هه‌واڵ - شوان عه‌زیز
کۆمێنت (0)
تا ئێستا هیچ کۆمێنتێک نەکراوە.