نرخی دۆلار جارێكی دیكە بەرزبۆوەو ئابوریناسێكیش هۆكارەكەی ئاشكرا دەكات

دوای نیوەڕۆی ئەمڕۆ جارێكی دیكە نرخی دۆلار بەرامبەر بە دیناری عێراقی لە بازاڕە ناوخۆییەكانی عێراق بەرزبۆوە.
لە بەغدا نرخی كڕینی 100 دۆلار 145 هەزار و 500 دینارە، هەروەها نرخی فرۆشتنیش 143 هەزار و 500 دینارە. لەشارەكانی هەرێمی كوردستانیش نرخی كڕینی 100دۆلار گەیشتە 146 هەزار دینار.
لەوبارەیەوە نەبیل مەرسومی پسپۆڕی بواری ئابووری رایگەیاند: هۆكاری سەرەكی دەگەڕێتەوە كە پێشتر ئێرانییەكان بڕیاریاندا كڕینی دۆلار لە بازاڕی ڕەشی عێراق ڕابگرن ، بەڵام  هەندێك جار نزیكەی 40%ی زیادە دەدەن بۆ هەر ملیۆن دۆلارێك ، ئەو پارەیەش دەچێتە دەست دەڵاڵ و ناوەند و قاچاخچییەكان كە پارە لە عێراقەوە دەگوازنەوە.
هەروەها دەڵێت: هەرچەندە عێراق لە مانگی نیساندا 3.5 ملیار دۆلاری فرۆشت، بەڵام نرخی دۆلار لە بازاڕی هاوتەریبدا جارێكی دیكە بەرزبووەوە و گەڕایەوە بۆ ئاستی 1450 دینار، ئەمەش بەهۆی گەڕانەوە بۆ میكانیزمی دارایی بازرگانی لەگەڵ ئێران لە ڕێگەی دۆلاری كاشەوە .
مەرسومی ڕوونیشیكردەوە، ئەگەر بانكی ناوەندی عێراق هەموو یەدەگی دراوی خۆی بەكاربهێنێت، ئەوا نرخی ئاڵوگۆڕی فەرمی بۆ دۆلار لەگەڵ ئەو نرخە هاوتەریبەدا ناگونجێت ، چونكە عێراق ساڵانە بازرگانییەكی گەورەی بە بڕی زیاتر لە 10 ملیار دۆلار لەگەڵ ئێراندا هەیە و كەرتی هەناردەكردنی ئێران بۆ عێراق زیاتر لە ملیۆنێك كرێكاری ئێرانی دامەزراندووە.