برایەک خوشکەکەی خۆی دەکوژێت و ڕادەکات

لە گوندێکی سنووری قەزای ئاکرێ برایەک خوشکەکەی خۆی دەکوژێت و ڕادەکات، بەپێی زانیارییە سەرەتاییەکان برایەکە بەهەڵە تاوانەکەی ئەنجام داوە.

نزیک کاتژمێر 04:00 ئێوارەی ئەمڕۆ یەکشەممە 07ـی 05ـی 2023 ڕووداوێکی کوشتن لە گوندی کێلەسپی سەر بە ناحییەی گردەسێن لە سنووری قەزای ئاکرێ ڕووی دا، پۆلیسی گردەسێن لەمبارەیەوە ڕایگەیاند: هێزەکانی پۆلیسی گردەسێن چوونەتە شوێنی ڕووداوەکە و دەرکەوت ئافرەتێکی تەمەن 26 ساڵ بەناوی (ک.ئـ.ح) کوژراوە.

ڕاشیگەیاند: بەپێی لێکۆڵینەوە سەرەتاییەکان دەرکەوت کە ئافرەتەکە لەلایەن براکەی خۆی کوژراوە، دواتر لاشەی ئافرەتەکە ڕەوانەی پزیشکی دادی دهۆک کرا.

پۆلیسی گردەسێن ئاماژەی بەوەش داوە کە پەڕاوی لێکۆڵینەوە لە تاوانەکە کراوەتەوە و  تۆمەتبارەکە هەڵاتووە و دادوەر فەرمانی دەستگیرکردنی بۆ دەرکراوە.

هاوکات غەفار تەیب پەیامنێری (کوردستان تیڤی) لەبارەی ڕووداوەکە پێی ڕاگەیاندین، کە بەپێی زانیارییە سەرەتاییەکان برایەکە بەهەڵە فیشەکێکی لەسەری خوشکەکەی داوە.