له كۆبوونه‌وه‌ی ئه‌مڕۆی لیژنه‌ی ڕێكخستنه‌وه و په‌ره‌پێدانی هاتوچۆی هه‌ولێر بیرۆکەى دروستکردنى هێڵى تایبەتى پایسکل لە شەقامە سەرەکییەکانى شاری هەولێر خرایەڕوو.
ئێوارەى ئەمڕۆ دووشەم بە سەرپەرشتی ئومێد خۆشناو پارێزگاری هەولێر کۆبوونەوەی لیژنەى ڕێکخستنەوە و پەرەپێدانی هاتووچۆى هەولێر ئەنجامدرا، له كۆبوونه‌وه‌كه‌دا تیشک خرایە سەر پەرەپێدان و باشترکردنی سیستەمی هاتووچۆی ناو شار و ڕێکخستنەوە و نۆژەنکردنەوەى شەقام و شۆستەکان و ئەو شوێنانەی کە پێویستیان بەچاککردن هەیە.
لە تەوەرێکى ترى کۆبوونەوەکەدا بیرۆکەى دروستکردنى هێڵى تایبەتى پایسکل لە شەقامە سەرەکییەکانى شارى هەولێر خرایه‌ڕوو لەپێناو فەراهەمکردنى هاتووچۆیەکى لەبار و پاراستنى سەلامەتى گیانى هاووڵاتییان و نەهێڵانى سەرپێچى و زێدەڕۆییەکان.
له ته‌وه‌رێكی تری كۆبوونه‌وه‌كه‌دا جەخت لە چارەسەرکردن و ڕێکخستنەوەى مەیدانى پەلەوەران و شوێنى کۆنەفرۆشان و هاتووچۆى ماتۆڕسکیل و گەیاندنى خێراى (دلیڤەرى) سەرجەم کۆمپانیان و چێشتخانەکان کرایەوە، پاشان تەئکید لەسەر بەردەوامیدان بە هەڵمەتى دەستبەسەرداگرتنى ماتۆڕسکیلى بێ مۆلەت و وەرگرتنى ئیجرائاتى توند لە بەرامبەر هەموو ئەو شوێنانەى کە ماتۆڕسکیلى بێ سەرەتای لێ دەفرۆشرێت و مامەڵەیان پێوە دەکرێت کرایەوە.
کۆمێنت (0)
تا ئێستا هیچ کۆمێنتێک نەکراوە.