ماوەی لێخۆشبوونی 15%ـی کرێی ئاو درێژ کرایەوە

بەڕێوەبەرایەتیی ئاو و ئاوەڕۆی هەرێمی کوردستان بڕیارێکی دیکەی لەبەرژەوەندی هاووڵاتییان دەرکرد و ماوەی لێخۆشبوونی 15%ـی کرێی ئاوی درێژ کردەوە.

لە ڕاگەیەنراوێک بەڕێوەبەرایەتیی ئاو و ئاوەڕۆی هەرێمی کوردستان ڕایگەیاند: دوای هەڵسەنگاندنی پڕۆسەی بابەتی لێخۆشبوونی ڕێژەی 15% کرێی ئاو و داواکاری زۆری هاووڵاتییان بۆ درێژکردنەوەی پڕۆسەکە و سوودمەند بوونیان، پاش پێشکەشکردنی ڕاپۆرتێک بۆ ئەنجوومەنی وەزیران بڕیار درا ماوەی لێخۆشبوون لە مانگێک بۆ دوو مانگ درێژ بکرێتەوە.

ڕاشیگەیاند: ماوەی لێخۆشبوونی 15%ـی کرێی ئاو تاوەکو 10ـی 06ـی ئەمساڵ بەردەوام دەبێت.

بەڕێوەبەرایەتیی ئاو و ئاوەڕۆی هەرێمی کوردستان ئاماژەی بەوەش دا کە تاوەکو ئێستا  زیاتر لە 12 هەزار هاووڵاتیی لە بڕیاری لێخۆشبوونی 15%ـی کرێی ئاو سوودمەند بوونە.

بەپێی ئەم بڕیارە كرێی بەستنی پێوەری ئاو لە سەنتەری شارە گەورەكان لە 80 هەزارەوە كراوەتە 20 هەزار دینار، هەروەها كرێی بەستنی پێوەر لە قەزا و ناحییە و كۆمەڵگەكانی دەرەوەی شارەكان لە 80 هەزارەوە كراوەتە تەنیا 10 هەزار دینار.