وەزارەتی ناوخۆ، بڕیاری داوە سەرجەم شەقامەکانی هەرێمی کوردستان دووبارە هێڵکارییان بۆ بکرێتەوە و یەکەمجاریشە لەلایەن کارمەندانی ناوخۆییەوە دەکرێت و زۆرترین هەلی کاری ڕەخساندووە.
چەند مانگێکە تیمەکانی وەزارەتی ناوخۆ، پڕۆسەی هێڵکاریی شەقامەکانی ناوەوەی شاریان دەست پێ کردووە و بەڕێوەبەری ئەندازەی هاتووچۆی هەولێریش دەڵێت: تاوەکو مانگی تشرینی یەکەم بەردەوام دەبن.
ئەو ئامێرانەشی کە بۆ ئەم کارە بەکاردەهێنرێن، لەلایەن حکوومەتەوە دابین کراون و لەگەڵیشیدا چەندین هەلی کاری بۆ هاووڵاتییان ڕەخساندووە.
دیلان عەبدوڵا، بەڕێوەبەری ئەندازەی هاتووچۆ ڕایگەیاند: ئەو پارەیەی ئێستا لە پڕۆسەکە خەرج دەکرێت، نیوەی ئەو تێچووەیە کە پێشتر بە کۆمپانیا دەرەکییەکان دەدرا و پرۆسەکەیان بەڕێوە دەبرد، دوای دابینکردنی ئامێر و ماددەی خامی بۆیەکردن، ئێستا پڕۆسەکە بە کوالیتییەکی باشتر و بە تێچووی کەمتر لەلایەن کارمەندانی ناوخۆییەوە بەڕێوە دەچێت.
لەبارەی کوالێتیی بۆیاغەکەوە، بەڕێوەبەری ئەندازەی هاتووچۆی هەولێر ڕاشیگەیاند: ئەو بۆیاغەی ئێستا بەکاری دەهێنن، سەرچاوەکەی دیارە و ئەو ماددانەشی کە لەگەڵی تێکەڵکراون، لەگەڵ کەشوهەوای هەرێمی کوردستان دەگونجێن و زۆتریش دەمێنێتەوە.
پڕۆسەی هێڵکاریکردنەوەی شەقامەکان، تەنیا بۆ ناوەوەی شارەکان نابێت و لەمبارەیەوە دیلا عەبدوڵا گوتی: بڕیارە شەقامەکانی دەرەوەی شاریش بگرێتەوە، ئەو پڕۆسەیە تاوەکو مانگی تشرینی یەکەم بەردەوام دەبێت و هەوڵ دەدرێت هێڵکاری بۆ زۆرینەی شەقامەکان بکرێت.
سەبارەت بە زوو کاڵبوونەوەی هێڵکاریی شەقامەکان، بەڕێوەبەری ئەندازەی هاتووچۆی هەولێر ئاماژەی بەوە دا کە خراپی کوالێتیی تایەی ئۆتۆمبێلەکان و کەشوهەوای ناوچەکە، کاریگەریی لەسەر هەیە.
هەر لەمبارەیەوە لای خۆیەوە فەرمانگەی میدیا و زانیاری جەختی کردەوە کە کابینەی نۆیەمی حکوومەتی هەرێمی کوردستان، لە خزمەتکردنی هاووڵاتیان و دابینکردنی خزمەتگوزارییەکان بەردەوامە، ئەوەش بە ئەرکی خۆی دەزانێت و هەوڵەکانیشی بۆ ڕەخساندنی زۆرترین هەلی کار بۆ دەستی کاریی ناوخۆیی، بەردەوام دەبێت.
کۆمێنت (0)
تا ئێستا هیچ کۆمێنتێک نەکراوە.