رێگەی دەروازەی نێودەوڵەتی زێت لە قۆناغی دووەمدا دەكرێتە جووتساید 

دوێنێ چوارشەممە، دەروازەی زێت بە رووی گەشتیاراندا كرایەوە و بەرپرسانی هەرێمی كوردستانیش رایدەگەیەنن كە لە ئایندەیەكی نزیكیشدا، دەروازەكە بە رووی بازرگاناندا دەكرێتەوە و جووڵە بازرگانییەكانی لێ ئەنجام دەدرێت، هاوكات ئەوەش دەخەنەڕوو كە وەك ئاسانكارییەك لەئێستادا خەریكی بە جووتسایدكردنی رێگاكەن.
پارێزگاری هەولێر، ئومێد خۆشناو لەبارەی گرنگی كردنەوەی دەروازەكە لە لێدوانێكیدا گوتی: زۆر دڵخۆشین بەجێبەجێكردنی یەكێك لە پلانە ھاوبەشەكانی حكوومەتی ھەرێم و حكوومەتی توركیا، ھەروەھا بەردەوام سەرۆكوەزیرانی هەرێم ئێمەی راسپاردووە بۆ چاودێریكردن و تەواوكردنی پڕۆژەكە و لە قۆناغی یەكەمدا لەم دەروازەیە تەنیا جووڵەی گەشتیاریی دەبێت و لە قۆناغی دووەمیشدا جووڵەی بازرگانیی دەبێت، بە كردنەوەی ئەم دەروازەیە خەڵكی ھەردوو دەڤەرەكە سوودمەند دەبن، دەرفەتی كاری زیاتر تیادا دەڕەخسێت، پەیوەندییە كولتوور و كۆمەڵایەتییەكانی ھەردوولا بەھێزتر دەكات، هەروەها یەكەمین دەروازەی سنووریشە كە پارێزگای ھەولێر و توركیا بەیەكەوە دەبەستێتەوە.
ئومێد خۆشناو لەبارەی رێكارەكانی هاتن و چوونی هاووڵاتییانەوە، گوتی: 'خەڵكی دەتوانن وەك دەروازەیەكی ئاسایی هاتوچۆی پیادا بكەن، هەروەها قۆناغی دووەمیش بریتییە لە بە جووتسایدكردنی دەروازەی زێت بە قەزای مێرگەسۆر و لەوێشەوە بۆ ئیدارەی سەربەخۆی سۆران'.
دەروازەكە تەواوی رۆژانی هەفتە بە رووی گەشتیاراندا كراوە دەبێت و گەشتیاران دەتوانن لە كاتژمێر هەشتی بەیانی تا هەشتی شەو گەشتەكانیان لە رێگای ئەم دەروازەیە ئەنجام بدەن.