یانه‌ی به‌رشه‌لۆنه‌ی ئیسپانی بڕوای ته‌واوی به گه‌ڕانه‌وه‌ی ئه‌ستێره‌ی ئه‌رجه‌نتینی لیۆنێل میسی بۆ ڕیزی یانه‌كه‌ی هه‌یه و بۆ ئه‌م مه‌به‌سته‌ش پلانێكی تۆكمه‌ی بۆ گه‌ڕانه‌وه‌ی داڕشتووه.
گرێبه‌سته‌كه‌ی میسی له‌گه‌ڵ یانه‌ی پاریس سان جێرمانی فڕه‌نسی له هاوینی داهاتوو كۆتایی دێت و تا ئێستاش یانه‌كه سه‌ركه‌وتوو نه‌بووه له نوێكردنه‌وه‌ی ماوه‌ی گرێبه‌سته‌كه‌ی.
ئێدوارد رۆمیۆ جێگری سه‌رۆكی یانه‌ی به‌رشه‌لۆنه له چاوپێكه‌وتنێكدا له‌گه‌ڵ رۆژنامه‌ی (سپۆرت)ی ئیسپانی گوتی: پلانێكی تۆكمه‌كان بۆ گه‌ڕانه‌وه‌ی میسی داڕشتووه و له چه‌ند رۆژی داهاتوودا پێشكه‌شی یه‌كێتی تۆپی پێی ئیسپانیای ده‌كه‌ین.
گوتیشی: پێموانییه یه‌كێتی تۆپی پێی ئیسپانیا هیچ ڕێگرییه‌كی هه‌بێت له گه‌ڕانه‌وه‌ی میسی دوای دوو ساڵ له جێهیشتنی یانه‌كه.
ئه‌مه له‌كاتێكدایه كه یانه‌ی هیلالی سعوودیش گرێبه‌ستێكی خه‌یاڵی و گرانبه‌های بۆ گرێبه‌ستكردن له‌گه‌ڵ میسی ئاماده‌كردووه.
لیۆنیل میسی باشترین یاریزانی جیهان له هاوینی ساڵی 2021 به فه‌رمی ریزی یانه‌ی به‌رشه‌لۆنه‌ی جێهێشت و له دوو ساڵی ڕابردوودا له ریزی یانه‌ی پاریس سان جێرمان له خولی فڕه‌نسا یاری كردووه.
کۆمێنت (0)
تا ئێستا هیچ کۆمێنتێک نەکراوە.