ژمارەی ئەو کەسانەی بەهۆی خۆڵبارینەوە لە پارێزگایەک گەیەنراونەتە نەخۆشخانە ڕاگەیەنرا

شەپۆلێکی خۆڵبارین شار و شارۆچکەکانی هەرێمی کوردستانی گرتووەتەوە، بەهۆیەوە ژمارەیەک کەس لە شاری کەرکووک گەیەنراونەتە نەخۆشخانەوە.

ئەمڕۆ شەممە 13ـی 05ـی 2023 شەپۆلێکی خۆڵبارین ناوچەکانی هەرێمی کوردستانی گرتەوە، بەڕێوەبەرایەتیی تەندروستی کەرکووک ڕایگەیاند: تاوەکو ئێستا بەهۆی خۆڵبارینەوە 19 کەس گەیەنراونەتە نەخۆشخانە کە دووچاری هەستیاری سییەکان و تەنگەنەفەسی بوونەتەوە.

بەڕێوەبەرایەتیی تەندروستی کەرکووک، ئاماژەی بەوەش داوە کە ئەو ئامارەی ڕایگەیاندووە، لە کاتژمێر 06:00 بەیانییەوە تاوەکو کاتژمێر 09:00ـی شەو هەژمار کراوە.

بەپێی پێشبینییەکانی کەشناسی هەرێمی کوردستان چاوەڕوان دەکرێت کاریگەری خۆڵبارینەکە لە ماوەی چەند کاتژمێری داهاتوو لەسەر ناوچەکەمان کەم ببێتەوە.