ئه‌مڕۆ پێنجشه‌م بە ئامادەبوونی وەزیری شارەوانی و گەشتوگوزار، پرۆسەی تیروپشك بە پێدانی چەند پارچە زەوییەك بۆ قەرەبووكردنەوەی هەر خاوەن مافێکی گوندی ڕەشكین بەڕێوەچوو و هەر ئەمڕۆش سەنەدی زەوییەكانیان وەرگرت.
ساسان عەونی وەزیری شارەوانی و گەشتوگوزار لەمیانەی بەڕێوەچوونی پرۆسەی تیروپشكه‌كه ڕایگەیاند: مافی دانیشتووانی ڕەشكین زۆر بە زیادەوە حسابی بۆ كراوە و لە شوێنە زۆر باشەكانی شاری هەولێر زەوییەکەیان وەردەگرن.
ئاماژەی بەوەش كرد كه ڕەشكین كەوتووەتە ناوچەی قەدەغەكراوی فڕۆكەخانەی هەولێر و لە ماستەرپلاندا سەوزاییە، بۆیە ئەو دامەزراوانەی ئەوێ لەوێ لادەچێت و لە شوێنەكەشی شەقامی دووساید بەناوی شەقامی ڕەشكین لەوێ دروست دەكرێت، هەروەها دەكرێتە پارك و ناوچەی سەوزایی و بە هەمانشێوە بەناوی "ڕەشكین" دەكرێن، ئەمەش بۆ ئەوەیە ناوی ڕەشكین بمێنێتەوە.
ساسان عەونی لە بەشێكی تری قسەكانیدا تیشكی خستە سەر فەرمانی سەرۆكی حكوومەت لە قەرەبووكردنەوەی دانیشتووانی ڕەشكین و لەمبارەیەوە گوتی: لەسەر ڕاسپاردەی مەسرور بارزانی سەرۆكی حكوومەتی هەرێمی كوردستان بۆ ئەوەی دانیشتووانی ڕەكشین، مافیان نەفەوتێت و بە زیادەوەش مافیان پێ بدرێت، لە نزیكترین و باشترین شوێنەكانی شاری هەولێر بۆ قەرەبووكردنەوەی دانیشتووانی ڕەشكین، لە كەرتی 32ی پارك و ناوچەی تێرمیناڵ لە هەولێر زەوییان بۆ تەرخانکراوە، بۆیە لەسەر ڕاسپاردەی سەرۆكی حكوومەت گرنگترین زەوی شاری هەولێر بۆ دانیشتووانی ڕەشكین كردە قەرەبوو و شوێنی سەكەنی، بۆیە بە زیادەوە قەرەبووی دانیشتووانی ڕەشكین کراوەتەوە و هەر ئەمڕۆش سەنەدی تاپۆ وەردەگرن.
ساسان عەونی، وەزیری شارەوانی و گەشتوگوزار سەبارەت بە ڕێپێدان بە قەرەبووكراوەكانی ڕەشكین، گوتی: ئەوەی حەز دەكات لە 32ی پارك دەست بە دروستكردنی خانووەكەی بكات، ئەمڕۆ سەنەد وەردەگرێت و بە هەمانشێوە لە تێرمیناڵیش سەنەد وەردەگرن و یەكسەر ڕێپێدانیش وەردەگرن.
سەبارەت بە هەر سكالایەك لەسەر شێوازی قەرەبووكردنەوەكە، ساسان عەونی گوتی: هەر كەسێك ناڕازییە یان پێیوایە مافی وەك پێویست نەدراوە، تاوەكوو یەك هەفتە، لیژنەی قەرەبووكردنەوە سكاڵاكان وەردەگرێت.
کۆمێنت (0)
تا ئێستا هیچ کۆمێنتێک نەکراوە.