ده‌قی وتاره‌كه‌ی ئه‌مڕۆی سه‌رۆكی حكوومه‌ت

ئەمڕۆ پێنجشه‌م مەسرور بارزانی سەرۆکی حکوومەتی هەرێمی کوردستان
بەردی بناخەی یەکەم وێستگەی کارەبای بە وزەی خۆر لە پارێزگای هەولێر دانا کە توانای بەرهەمهێنانی 25 مێگاوات کارەبای هەیە لە کاتژمێرێکدا.

سەرۆکی حکومەت له‌ ڕێوڕه‌سمه‌كه‌دا گوتارێکی بەم بۆنەیە پێشکەش کرد و جەختی لەوە کردەوە کە پێویستە زۆر گرنگی بە بەكارهێنانی وزەی خاوێن و ژینگەدۆست و جێگرەوە بدەین.

ئه‌مه‌ی خواره‌وه‌ دەقی گوتاره‌كه‌ی مه‌سرور بارزانی سەرۆکی حکوومەتی هەرێمی کوردستانە:-

بەناوی خوای گەورە و میهرەبان
بەڕێزان ئامادەبووانی هێژا
سوپاس بۆ ئامادەبوونتان، زۆر زۆر بەخێر بێن.

بۆ من مایەی خۆشحاڵییە كە ئەمڕۆ بەردی بناخەی یەكەم پرۆژەی وێستگەی كارەبا بە وزەی خۆر لە هەولێر دادەنێین كە توانای بەرهەمهێنانی 25 مێگاوات كارەبای هەیە لە یەك كاتژمێردا. دەستخۆشی لە وەزارەتی كارەبا و كۆمپانیاكانی جێبەجێكاری ئەم پرۆژە گرنگە دەكەم. هیوادارم ئەمە ببێتە سەرەتایەك بۆ ئەنجامدانی چەندین پرۆژەی هاوشێوە لە سەرجەم شارەكانی كوردستان.

پێویستە زۆر گرنگی بە بەكارهێنانی وزەی خاوێن و ژینگەدۆست و جێگرەوە بدەین، ئێمە پشتیوانییەكی زۆری وەزارەتی كارەبامان كردووە بۆ ئەوەی چاكسازی لەم كەرتەدا بكەن، تا وەكو بتوانن بە شێوەیەكی باشتر و شایستەتر خزمەتی هاووڵاتییانی هەرێمی كوردستان بكەن. لەم ڕووەوە جێگەی دەستخۆشییە كە وەزارەتی كارەبا دەستی بە پرۆسەی چاكسازی كردووە لەپێناو باشتركردنی ژێرخانی كارەبا و نەهێشتنی سەرپێچی و زێدەڕەوییەكان لەسەر ئەم كەرتە، هەروەها هەوڵیداوە لە ڕێگەی بەكارهێنانی پێوەری زیرەك، ڕێگە لە بەفیڕۆدانی كارەبا بگرێت، سەرەنجام كاتژمێرەكانی پێدانی كارەبا زیاتر بكات.

بەڵام بێگومان كەرتی كارەبا پێویستی بە گەشەپێدانی زیاتر هەیە بۆ ئەوەی بە شێوەیەكی باشتر خزمەتی هاووڵاتییان بكات، لەم ڕووەوە پێویستە وەزارەتی كارەبا بە هاوكاریی كەرتی تایبەت، هەموو هەوڵێكی خۆیان بخەنە گەڕ، پلان و ئامادەكاریی پێویست بكەن بۆ ئەوەی لە داهاتوودا بتواندرێت كارەبای بەردەوام بە هاووڵاتییان بدرێت، كە بۆ نموونە پێویستە یەكێك لە هەنگاوەكانیان بەكارهێنانی وزەی خۆر و سەرچاوەكانی دیكەی وزەی نوێبووەوە یاخود ئەوەی پێی دەڵێن (Renewable Energy) و ژینگەدۆست بێت.

ئێمە دەرفەتی زۆرمان هەیە كە كەرتی كارەبا زۆر لە ئێستا باشتر بكەین، بۆ ئەوەی زیاتر خزمەت بە هاووڵاتییان بكات، بەڵام لە هەمانكاتدا پێویستە هاووڵاتییانیش هاوكاریی خۆیان و حكوومەت بكەن، ئەویش لە ڕێگەی ڕێگرتن لە بەهەدەردانی كارەبا و كەمكردنەوەی زیادبەكارهێنانی كارەبا و پێدانی ڕسووماتی كارەبا بە شێوەیەكی ڕێك و بەردەوام، بۆ ئەوەی حكوومەتیش بتوانێت بەشێكی خەرجییە زۆرەكانی بەرهەمهێنانی كارەبا دابین بكات و كارەبا بە باشی بە هاووڵاتییان بدات، چونكە هاووڵاتییانی خۆشەویست دەبێ ئەوە بزانن كە ئەو كارەبایەی لەلایەن كەرتی گشتی و لەلایەن حكوومەتەوە بە نرخێكی زۆر هەرزان پێیان دەدرێت، زۆر كەمترە لە تێچووی بەرهەمهێنان و گواستنەوە و دابەشكردنی بەسەر هاووڵاتییاندا، حكوومەت ساڵانە ملیۆنان دۆلار لەم بوارەدا خەرج دەكات كە دەكرێ ئەم بودجەیە زۆر كەم بكرێتەوە، ئەگەر هاووڵاتییان هاوكاریی حكوومەت بكەن.

هاووڵاتییانی بەڕێز دەزانن كە لەو ماوەی رابردوو، ڕاستە ئێمە بەرهەمهێنانی كارەبامان زیاد كردووە، بەڵام تاكو ئێستا وەكو پێویست نەمانتوانیوە 24 كاتژمێر كارەبا دابین بكەین، ئەمەش هۆكاری زۆرە، یەكێك لە هۆكارەكان ئەوەیە كە پێویستی و بەكارهێنانی كارەبا لەم ماوەیەدا زۆر زیادی كردووە، ژمارەی دانیشتووانی هەرێمی كوردستان زیادیان كردووە، هەرچەندە ئێمە چەندین وێستگەی بەرهەمهێنانی كارەبامان زیاد كردووە، بەڵام نەیانتوانیوە ئەو پێداویستییەی كە كوردستان هەیەتی، دابین بكەن. هەروەك گوتم هەم ژمارەی هاووڵاتییان زیادی كردووە، هەم ژمارەی كارگە و كارخانەكان لە هەرێمی كوردستان زیادیان كردووە، پێویستیی هاووڵاتییانیش یاخود بەكارهێنانی ئامێرە كارەباییەكان بۆ ژیانی رۆژانەیان، زیادیان كردووە.

بۆ ئەوەی ئێمە بتوانین لێرەدا هاوكاریی یەكتر بكەین، دەڵێم هاوكاریی یەكتر بكەین مەبەستم ئەوەیە هەم حكوومەت بتوانێت باشتر خزمەتگوزاریی بە هاووڵاتییان بگەیەنێت، هەم هاووڵاتی بتوانن ئەركەكەی خۆیان جێبەجێ بكەن، هەردوولامان ئەركمان لەسەرە، حكوومەتی هەرێم ئەركی ئەوەیە خزمەتگوزاریی باشتر بە هاووڵاتییان بگەیەنێت، هاووڵاتییانیش ئەركیان ئەوەیە كە بتوانن ئەو رسووماتە و ئەو بەرپرسیارێتیی و ئەو ئەركە هاوبەشەی دەكەوێتە سەریان، ئەوانیش جێبەجێی بكەن.

هاووڵاتییان، خۆیان لەوانەیە ئەوانەی كە 24 سەعات كارەبایان دەوێت یان پێویستییان پێیەتی و حكوومەت ناتوانێت بۆیان دابین بكات، پەنا دەبەنە بەر موەلیدە، ئەو بڕە پارەیەی كە پێویستە و دەبێ بە موەلیدەكان بدەن، حكوومەت بەرنامەی هەیە بەوەی كە بتوانێت بە ئەركێكی كەمتر، بە نرخێكی كەمتر ئەو كارەبایە بۆ هاووڵاتییان دابین بكات كە 24 سەعاتیش بێت، بەو شێوەیە كە ئەگەر هاووڵاتییان ئەو رسووماتەی حكوومەت داوای دەكات، بیدەن و ئەو ئەرك و بەرپرسیارێتییەی لەسەر شانیانە جێبەجێی بكەن، حكوومەت دەتوانێت بەو شێوەیە ئەو كارەبایەیان بۆ دابین بكات، بە مەرجێك هاووڵاتییانیش رسووماتی خۆیان بدەن بە حكوومەت، ئەو پارەی دەیدەن بە موەلیدەكان، كەمتر لەوەش ئەگەر بدەن بە حكوومەت، دەتوانن خۆیان لە چەند سەرئێشەیەك بەدوور بگرن، یەكێك لەوانە بۆ نموونە دەنگی موەلیدە لە گەڕەكەكان لەوانەیە زۆر ناخۆش بێت، یاخود بۆنی گازوایل، یان لەوانەیە چەندین كێشەی تر، نرخی كارەبا، ئەمانە هەمووی حكوومەت دەتوانێت ڕێك بكەوێت، لەگەڵ كەرتی تایبەت ڕێك بكەوێت و لەگەڵ هاووڵاتی ڕێك بكەوێت، بەو بەرنامانەی كە دامانڕشتووە، حكوومەتی هەرێم بتوانێت كارەبای 24 سەعاتی بە هاووڵاتییان بدات، بە مەرجێك هاووڵاتییانیش خۆیان بە بەرپرس بزانن و ئەوانیش وەڵامدانەوەیان هەبێت بەرامبەر بەو ئەرك و خزمەتگوزارییانەی حكوومەت.

بۆیە من لێرە داوا لە هەموو هاووڵاتییان دەكەم، ئەم حكوومەتە بە هی خۆیان بزانن و خۆیان بە بەشدار بزانن لە بەڕێوەبردنی حكوومەت و بەشدار بن لە حكومڕانی، حكوومەت شتێكی نامۆ نییە و شتێكی جیاواز نییە لە ئێوە، بەشێكە لە ئێوە، ئەركی حكوومەت ئەوەیە خزمەتگوزاری بە ئێوە بگەیەنێت، ئێوەش ئەركتانە هەم وڵاتی خۆتان بپارێزن و ژینگەی خۆتان بپارێزن، ئەوەی لەسەر هەردوولامانە، بتوانین هاوكاریی یەكتر بكەین.

جارێكی تریش دەستخۆشی لە وەزارەتی كارەبا و كۆمپانیاكانی جێبەجێكاری ئەم پڕۆژە گرنگە دەكەم، هیوادارم پڕۆژەی كارەبا بە وزەی خۆر و وزەی نوێبووەوە و پاك و ژینگەدۆست زیاتر گەشە بكەن لە كوردستان، جارێكی تر دەستخۆشیتان لێ دەكەم، هیوادارم هەمیشە سەركەوتوو بن و كوردستانیش هەر ئاوەدان بێت.