وه‌زیری په‌روه‌رده‌ی حكوومه‌تی هه‌رێمی كوردستان سوپاسی هه‌ریه‌ك له وه‌زیری ناوخۆ و ئاسایشی هه‌ولێر و سلێمانی كرد به‌هۆی ده‌ستگیركردنی ئه‌و كه‌سانه‌ی كه ئامێره‌كانی بلوتووزیان ده‌فرۆشت و بانگه‌شه‌ی فرۆشتنی پرسیاره‌كانی پۆلی 9ی بنه‌ڕه‌تی و 12ی ئاماده‌ییان ده‌كرد.
ئالان حه‌مه سه‌عید وه‌زیری په‌روه‌رده ڕایگه‌یاند "سوپاسی بەڕێزان (جەنابی وەزیری ناوخۆ) و (ئاسایشی هەولێر) و ( ئاسایشی سلێمانی) دەکەین، پاڵپشتیان بۆ بەدیهێنانی دادپەروەری لە تاقیکردنەوەکانی قوتابییانی پۆلە کۆتاییەکان (9ی بنەڕەتی و 12ی ئامادەیی) و دەستگیرکردنی یاساشكێنەران جێگەی دەستخۆشی و پێزانینمانە".
ڕاشیگه‌یاند "وەک لە بڵاوکراوەکەی بەڕێوەبەرایەتی ئاسایشی هەولێر هاتووە كه ئەوەی ئاماژەی پێدراوە هی سێ رۆژی رابردوو بووە، بەڵام لە پێشتریش چەندین باندی فریودەر و یاساشکێنی دیکەشیان دەستگیر کردوو".
هه‌روه‌ها ڕایگه‌یاند "ئەم پرۆسەیە لە هەموو پارێزگا و ئیدارە سەربەخۆکان بەردەوامە و هەماهەنگیمان لەگەڵ هێزەکانی ئاسایش هەیە و هەموولایەک دڵنیا دەکەینەوە کە ئەم پرۆسەی بەدواداچوون و رووبەڕووکردنەوەی یاساشکێنەران بە دادگە بەردەوامی دەبێت لە پێش و لە کاتی تاقیکردنەوەکان و لە پاش تاقیکردنەوەکانیش".
ئالان حه‌مه سه‌عید وه‌زیری په‌روه‌رده داواشی لە قوتابییان كرد لەگەڵ ئەو باندانە فریو نەخۆن و ئەوە بە شیاوی خۆیان بزانن کە بە توانای خۆیان بە دەستی دەهێنن. جه‌ختیشی كرده‌وه كه ڕێنماییەکانی گزیکردن (غش) لە تاقیکردنەوەی پۆلە کۆتاکان ڕوونن.
کۆمێنت (0)
تا ئێستا هیچ کۆمێنتێک نەکراوە.