نیوه‌ڕۆی ئه‌مڕۆ هه‌ینی و كه‌مێك پێش ئێستا كۆبوونه‌وه‌ی سه‌رۆكایه‌تی په‌رله‌مانی كوردستان له‌گه‌ڵ به‌شی هه‌ڵبژاردنی پارتی و ده‌زگای هه‌ڵبژاردنی یه‌كێتی له باڵه‌خانه‌ی په‌رله‌مان ده‌ستی پێ كرد.
په‌یامنێری (كوردستان تیڤی) پێی ڕاگه‌یاندین: كه‌مێك پێش ئێستا كۆبوونه‌وه‌ی سه‌رۆكایه‌تی په‌رله‌مانی كوردستان له‌گه‌ڵ به‌شی هه‌ڵبژاردنی پارتی دیموكراتی كوردستان و ده‌زگای هه‌ڵبژاردنی یه‌كێتی نیشتمانی كوردستان له‌نێو باڵه‌خانه‌ی په‌رله‌مان ده‌ستی پێ كرد.
وه‌ك چاوه‌ڕوان ده‌كرێ له كۆبوونه‌وكه‌دا سه‌رۆكایه‌تی په‌رله‌مانی كوردستان له‌گه‌ڵ به‌شی هه‌ڵبژاردنی پارتی و ده‌زگای هه‌ڵبژاردنی یه‌كێتی، تاوتوێی پرسی كاراكردنه‌وه‌ی كۆمیسیۆنی باڵای هه‌ڵبژاردنه‌كان و هه‌مواركردنه‌وه‌ی یاسای هه‌ڵبژاردنه‌كان و ده‌ستپێكردنی ئاماده‌كارییه‌كان بۆ به‌ڕێوه‌چوونی هه‌ڵبژاردنی په‌رله‌مانی كوردستان بكات.
ئه‌م كۆبوونه‌وه‌یه له كاتێكدایه كه رۆژی سێشه‌می ڕابردوو هه‌ردوو مه‌كته‌بی سیاسی پارتی و یه‌كێتی له شاری سلێمانی كۆ ببوونه‌وه.
كۆبوونه‌وه‌كه دوای ده‌ستپێشخه‌رییه‌كه‌ی سه‌رۆك بارزانی هات كه رۆژی پێنجشه‌می هه‌فته‌ی ڕابردوو له مه‌ڕاسیمی كردنه‌وه‌ی یادگه‌ی نیشتمانی بارزانی له بارزان داوای له سه‌رجه‌م حزب و لایه‌نه‌كانی هه‌رێمی كوردستان كردبوو كۆببنه‌وه به مه‌به‌ستی كۆتاهێنان به دۆخی چه‌قبه‌ستوویی هه‌رێمی كوردستان.
سه‌رۆك بارزانی به‌تایبه‌تی داوای له مه‌كته‌بی سیاسی پارتی دیموكراتی كوردستان و یه‌كێتی نیشتمانی كوردستان كردبوو، له نزیكترین ماوه‌دا ڕێك بكه‌ون بۆ ده‌ستكردن به ئاماده‌كارییه‌كان به‌مه‌به‌ستی ئه‌نجامدانی هه‌ڵبژاردنه‌كانی هه‌رێمی كوردستان.
کۆمێنت (0)
تا ئێستا هیچ کۆمێنتێک نەکراوە.