فراكسیۆنی پارتی لەپەرلەمانی عێراق: ئەمەی یەكێتی و نەیارانی هەرێمی كوردستان كردوویانە پیلانێكی ژەهراوییە 

فراكسیۆنی پارتی دیموكراتی كوردستان لە ئەنجومەنی نوێنەرانی عێراق لە ڕوونكردنەوەیەكدا رایدەگەێنێت، كۆمەڵێك پەرلەمانتاری لایەنەكان دەنگیان بە زیاد كردنی هەندێك  بڕگەی نوێ بۆ هەردوو مادەی (13و 14) ی پرۆژە یاسای بودجە دا ، ئێمە لە فراكسیۆنی پارتی دژی ئەم نادادی و غەدرە گەورەیە دەوەستینەوە  كە لە خەڵكی كوردستان دەكرێت و هەوڵەكانمان لە پێناو چەسپاندنی مافە ڕەواكانی گەلەكەمان بەگەڕ دەخەین.
هەروەها دەڵێت: ئەمەی یەكێتی و نەیارانی هەرێمی كوردستان كردویانە پیلانێكی ژەهراوییە دژی هەرێمی كوردستان و هیچی لە خیانەتی 17 ی ئۆكتۆبەر كەمتر نییە.
دەقی روونكردنەوەكەی فراكسیۆنی پارتی دیموكراتی كوردستان لە ئەنجومەنی نوێنەرانی عێراق..
بەداخەوە پێچەوانەی دەستور و پێچەوانەی ئەو دەقە نووسراوەی پرۆژە بودجەی عێراق بۆ ساڵانی ( 2023 و 2024 و 2025) كە لە ئەنجومەنی وەزیرانی عێراق و لە كۆبوونەوەی هاوپەیمانێتی بەڕێوەبردنی دەوڵەت ڕێكەوتنی لەسەر كرابوو ، هەروەها پێچەوانەی ڕێكەوتنی نێوان حكومەتی هەرێمی كوردستان و حكومەتی عێراقی فیدراڵ ، كۆمەڵێك پەرلەمانتاری لایەنەكان دەنگیان بە زیاد كردنی هەندێك  بڕگەی نوێ بۆ هەردوو مادەی (13و 14) ی پرۆژە یاسای بودجە دا ، ئێمە لە فراكسیۆنی پارتی دژی ئەم نادادی و غەدرە گەورەیە دەوەستینەوە  كە لە خەڵكی كوردستان دەكرێت و هەوڵەكانمان لە پێناو چەسپاندنی مافە ڕەواكانی گەلەكەمان بەگەڕ دەخەین ..
ئەوەی بۆ ئێمە جێگەی سەرسوڕمانە یەكێتی نیشتیمانی كوردستان لە لیژنەی دارایی پەرلەمانی عێراق جارێكی تر وەك و تەنها حزبی كوردی دەنگی خۆی خستە پاڵ ئەو دەنگانەی كە دژی مافە یاسایی و دەستورییەكانی خەڵكی كوردستان وەستانەوە ، بۆ ئەم دژ وەستانەوەشیان بەرامبەر مافە دەستوری و یاسایەكانی خەڵكی كوردستان دەیانەوێت پاسا و بەوە بهێننەوە گوایە پشتگیری گەڕانەوەی بەشێك لە مووچە پاشەكەوت كراوەكانی فەرمانبەرانی كوردستان دەكەن ! ئەمە خۆڵكردنە چاوی خەڵكە و دەمانەوێت بۆ هەموو لایەكی ڕوونبكەینەوە كە ئەگەر یاسایی بودجە وەك و ئەوەی لە لیژنەی دارایی پەرلەمانی عێراق  یەكێتی نیشتیمانی و  هەندێك لایەنی تر دەنگیان بۆ داوە تێبپەڕێت ، ئەوا نەك پاشەكەوت ناگەڕێتەوە بەڵكو چارەنووسی مووچەی فەرمانبەرانی هەرێم و سەرجەم شایستە داراییەكانی هەرێمی كوردستان دەكەوێتە مەترسییەكی گەورەوە ! 
هۆكاری یەكەمی پاشەكەوتكردنی بەشێك لە مووچەی فەرمانبەرانی هەرێمی كوردستان بۆ بڕینی بودجەو شایستە دارایەكانی هەرێم لە لایەن بەغدادەوە دەگەڕێتەوە ، بۆیە حكومەتی هەرێمی كوردستان و ئێمەش لە فراكسیۆنی پارتی لە هەوڵی جدیدا بووین  بۆ ئەوەی حكومەتی عێراق  پابەندێتی خۆی سەبارەت بە دانەوەی بەشێك لە مووچەی پاشەكەوت كراوی فەرمانبەرانی هەرێم جێبەجێبكات ، وە لە حاڵەتێكدا ئەگەر حكومەتی عێراقی فیدراڵ ئەم پابەندیە ئەخلاقییەی خۆیشی جێبەجێ نەكردایە ئەوە بەدڵنیاییەوە لە داهاتوو حكومەتی هەرێم خۆی پلانی بۆ دانەوەی پاشەكەوتی فەرمانبەرانی هەرێم دەبوو.
ئەمەی یەكێتی و نەیارانی هەرێمی كوردستان كردویانە پیلانێكی ژەهراوییە دژی هەرێمی كوردستان و هیچی لە خیانەتی 17 ی ئۆكتۆبەر كەمتر نییە.