محه‌مه‌د شیاع سوودانی سه‌رۆك وه‌زیرانی عێراق په‌یامێكی پیرۆزبایی ئاراسته‌ی ره‌جه‌ب ته‌یب ئه‌ردۆغان كرد به‌بۆنه‌ی بردنه‌وه‌ی گه‌ڕی دووه‌می هه‌ڵبژاردنه‌كانی سه‌رۆك كۆماری توركیا، هیواشی خواست دوای ئه‌م سه‌ركه‌وتنه په‌یوه‌ندییه‌كانی نێوان عێراق و توركیا زیاتر په‌ره‌بستێنێ.
سه‌رۆك وه‌زیرانی عێراق له تویتێكدا ڕایگه‌یاند "پیرۆزباییه‌كی گه‌رم ئاراسته‌ی براكه‌م ره‌جه‌ب ته‌یب ئه‌ردۆغان ده‌كه‌م به بۆنه‌ی دووباره به‌ده‌ستهێنانه‌وه‌ی متمانه‌ی گه‌له‌كه‌ی و هه‌ڵبژاردنه‌وه‌ی به سه‌رۆك كۆماری توركیا".
ڕاشیگه‌یاند "هیوا ده‌خوازین ئه‌م سه‌ركه‌وتنه ببێته به‌ره‌وپێشبردنی زیاتری په‌یوه‌ندییه‌كانی نێوان عێراق و توركیا و هه‌روه‌ها به‌رده‌وامی به په‌یوه‌ندییه دۆستایه‌تی و هاوكاری یه‌كتر بدات".
ئه‌مڕۆ یه‌كه‌شه‌م گه‌ڕی دووه‌می هه‌ڵبژاردنه‌كانی سه‌رۆك كۆماری توركیا به‌ڕێوه‌چوو و تێیدا ره‌جه‌ب ته‌یب ئه‌ردۆغان به‌ربژێری هاوپه‌یمانی جمهوور سه‌ركه‌وتنی به‌سه‌ر ركابه‌ره‌كه‌ی كه‌مال كڵیچدار ئۆغلو به‌ربژێری هاوپه‌یمانی میلـله‌ت به‌ده‌ستهێنا.
به‌گوێره‌ی ئه‌نجامه‌كانی هه‌ڵبژاردن كه تا ئێستا ده‌نگه‌كان به ڕێژه‌ی 99.57% جیاكراونه‌ته‌وه، ئه‌ردۆغان رێژه‌ی 52.11%ی ده‌نگه‌كانی به‌ده‌ستهێناوه، ركابه‌ره‌كه‌شی كڵچدار ئۆغلو رێژه‌ی 47.89%ی ده‌نگه‌كانی به‌ده‌ستهێناوه.
کۆمێنت (0)
تا ئێستا هیچ کۆمێنتێک نەکراوە.