شانۆی "تۆ مه‌چۆ بۆ شه‌ڕ" له‌ سلێمانی نمایش ده‌كرێت‬

نوێترین به‌رھه‌می "كۆڕی شانۆیی با"، بۆ یه‌كه‌مجار له‌ هۆڵی ڕۆشنبیریی سلێمانی نمایش ده‌كرێت
بڕیاره‌ له‌ 2ی 6 رۆژی هه‌ینی و  ڕۆژانی دواتریش، 5ـی ئێواره‌ شانۆیی "تۆ مه‌چۆ بۆ شه‌ڕ" له‌ هۆڵی ڕۆشنبیریی شاری سلێمانی ده‌ست به‌ نمایش بكات.
تۆ مه‌چۆ بۆ شه‌ڕ" شانۆییه‌كه‌ له‌ شیعره‌كانی (ماردین ئیبراهیم)ی شاعیره‌وه‌ وه‌رگیراوه‌ و (هۆرێن غه‌ریب) بۆ شانۆ ئاماده‌یكردوه‌ و ده‌رهێنانی بۆ ده‌كات. ھاوكات، كۆمپانیای (سۆ ماركێتینگ) كاری به‌رهه‌مهێنانی شانۆییه‌كه‌ی له‌ ئه‌ستۆ گرتوه‌ و به‌رھه‌مه‌كه‌ش به‌ ھاوبه‌شی له‌گه‌ڵ (به‌ڕێوه‌به‌رایه‌تیی گشتیی ڕۆشنبیری و ھونه‌ریی سلێمانی / به‌شی شانۆ) پێشكه‌ش ده‌كرێت.
له‌م به‌رهه‌مه‌ شانۆییه‌دا ژماره‌یه‌ك ئه‌كته‌ری دیار ڕۆڵ ده‌گێڕن، وه‌كو، پێشڕه‌و حسێن، ڕوبار ئه‌حمه‌د، ‫تاهیر عه‌بدولواحید، سه‌وسه‌ن عومه‌ر، میران شێرزاد و ژماره‌یه‌كی دیكه‌ش له‌ ئه‌كته‌رانی لێهاتوی بواری شانۆ. ‬‬
چیرۆكی شانۆگه‌رییه‌كه‌ له‌وێوه‌ ده‌ست پێده‌كات كه‌ شارۆچكه‌یه‌ك به‌هۆی جه‌نگه‌وه‌ وێران ده‌بێت و جه‌نگ سه‌رتاپای ده‌كات به‌ وێرانه‌. (ڕافائیل) جه‌نگاوه‌رێكه‌ له‌دوای هه‌موو جه‌نگێك دڕندانه‌تر ده‌رده‌كه‌وێته‌وه‌، به‌ زۆر كوڕه‌كه‌ی ڕه‌وانه‌ی به‌ره‌كانی پێشه‌وه‌ی جه‌نگ ده‌كات، ھه‌رچه‌نده‌ هاوژین و كچانی (ڕافائیل) بێ ئاگان له‌و هه‌موو جه‌نگه‌ بێهودانه‌ی پیاوان هه‌ڵیده‌گیرسێنن. له‌كاتێكدا كۆڵه‌كه‌ی ماڵه‌كه‌ له‌سه‌ر پشتی دایكه‌كه‌ ڕاوه‌ستاوه‌، له‌گه‌ڵ بڕیاری به‌جێھێشتنی ماڵه‌كه‌ له‌لایه‌ن دایكه‌كه‌وه‌ هه‌موو شته‌كان وێرانتر ده‌بن و شیرازه‌ی خێزانه‌كه‌ش ده‌پچڕێت. لێره‌شه‌وه‌ به‌شێوه‌یه‌كی سه‌رنجڕاكێش ده‌رهێنه‌ر بینه‌ران ئاوێته‌ی شانۆییه‌كه‌ ده‌كات و ده‌یانكات به‌ به‌شێكی دانه‌بڕاو له‌ ڕووداوه‌كانی دواتری (تۆ مه‌چۆ بۆ شه‌ڕ)
سۆران عوسمان، خاوه‌نی كۆمپانیای (سۆ ماركێتینگ)-ه‌، جگه‌ له‌ كاری پرۆدیوسه‌ری بۆ شانۆیی (تۆ مه‌چۆ بۆ شه‌ڕ)، له‌ ساڵی ٢٠٢٢یشدا شانۆیی (دوا ڕۆژه‌كانی بابلۆ)ی به‌رهه‌مهێنا كه‌ به‌ یه‌كێك له‌ پڕبینه‌رترین شانۆگه‌رییه‌كان له‌سه‌ر ئاستی باشوری كوردستان داده‌نرێت.