دوای نیوەڕۆی ئەمڕۆ چوارشەم لە کوێستانی گوندی زینوە لە سنووری حاجی ئۆمەران، بەهۆی پێداتەقینەوەی مین، هاووڵاتییەک بە سەختی بریندار بوو کە پیشەی مامۆستایە و بۆ مەبەستی بەدەستهێنانی گیا بەهارییەکان ڕووی لەم ناوچەیە کردووە.
راگەیاندنی بەرێوەبەرایەتی گشتی کاروباری مینی هەولێر رایگەیاند: کاتژمێر 3ی دوای نیوەرۆی ئەمڕۆ چوارشەم هاووڵاتییەک بە ناوی (مامۆستا وەلی قادر) لە کوێستانی (مێرگەدرێژان)ی سەر بە گوندی زینوەی سنووری شاره‌دێی حاجی ئۆمەران بەر مین کەوته‌وە و بە سەختی بریندار بووە.
راشیگەیاند: لە نەخۆشخانەی چۆمان چارەسەری سەرەتایی بۆ مامۆستا برینداره‌كه دەکرێت و دواتر بەرەو یەکێک لە نەخۆشخانەکانی شاری هەولێر دەگواسترێتەوە.
بەپێی ئاماره‌كانی بەڕێوەبەرایەتی گشتی کاروباری مینی هەولێر ته‌نیا ئەمساڵ ئەمە چوارەم رووداوی مینە لە سنووری پارێزگای هەولێر و ئیدارەی سەربەخۆی سۆران ڕوویانداوە کە تیایدا هاووڵاتییەک گیانی لەدەستداوە و سێ هاووڵاتی دیکەش کەمئەندام بوونە.
حاجی ئۆمه‌ران / کەریم سمکۆ
وێنه‌ی وه‌لی قادر ئه‌و مامۆستایه‌ی ئه‌مڕۆ مین پێیدا ته‌قییه‌وه:-
کۆمێنت (0)
تا ئێستا هیچ کۆمێنتێک نەکراوە.