ژینگەی كوردستان گەورەترین سەرمایە و سیاسەتی ژینگەییی کابینەى نۆیەم

حکومەتی هەرێمی کوردستان و دامەزراوەکانی، لەم کابینەیەدا گرنگیی زیاتریان بە بواری ژینگە داوە و، بۆ ئەو مەبەستەش دەستەى پاراستن و چاککردنی ژینگەى حکومەتی هەرێمی کوردستان کۆمەڵێک بەرنامە و سیاسەتی ژینگەیی پەیڕەو کردووە. عەبدولڕەحمان سدیق، سەرۆکی دەستەى ناوبراو، لەمبارەوە بۆ فەرمانگەى میدیا و زانیارى دواوە.

سیاسەتی ڕۆشنبیریی ژینگەیی لە هەرێمی کوردستان
عەبدولڕەحمان سدیق، سەرۆکی دەستەى پاراستن و چاککردنی ژینگەى حکومەتی هەرێمی کوردستان ڕایگەیاند :"په‌یامی ئێمه‌ ئه‌وه‌یه‌ ئه‌و ڕاستییه‌ دووپات بكه‌ینه‌وه‌ كه‌ كارنامەی كابینەی نۆیەمی حكومەتی هەرێمی كوردستان بە دروشمی: «ژینگەی كوردستان گەورەترین سەرمایەی هەرێمی کوردستانە»، هەموومانی پابەند كردووە بۆ برەودان بە ڕۆشنبیریی ژینگەیی و كەمكردنەوەی مەترسییە ژینگەییەكان".
عەبدولڕەحمان سدیق، دەشڵێت: " دەستەی ژینگە بەردەوام لە هەوڵدا بووە بۆ ئەوەی ڕۆژی ژینگە، تەنیا ڕۆژێك نەبێت بۆ باسی ژینگە، بەڵكوو كار دەكات بۆ ئەوەی هەموو ڕۆژەكانی ساڵ ببنە ڕۆژی ژینگە و ئەم بۆنەیەش ببێتە دەروازەی بیرخستنەوە بۆ هۆشیاریی زیاتر لە بواری ژینگەپارێزیدا و سەرنجڕاكێشانی بڕیاردەران بە لای پرسەكانی ژینگەدا و بایەخ پێدانێكی باشتر بە ژینگە".

ژینگەپارێزی؛ یەک ئامانج و چەندین پرۆژە
سەرۆکی دەستەی پاراستن و چاککردنی ژینگە، راشیگەیاند: "بۆ بایەخدان بە ژینگە، هەوڵ زۆرە بۆ ئەو جۆرە پڕۆژانەی دەبنە مایەی كەمكردنەوەی گۆڕانكارییەكانی کەشوهەوا، لە نموونەی ئەوانە: بەرهەمهێنانی كارەبا لە وزەی خۆر و ئاو و با، دابینكردنی هۆكارەكانی گواستنەوەی گشتیی، باڵەخانەی ژینگەیی ناسراو بە بیناكردنی سەوز، دامەزراندنی پارێزراوە سروشتییەكان و پاراستنی فرەجۆریی زیندەوەران (بایۆدایڤێرسیتی)، پرۆژە بچووكەكانی تایبەت بە لاوان و ئافرەتان لە بواری ئەو كارانەی، كە شوێنەواری گۆڕانكاریی کەشوهەوا كەم دەكەنەوە، بەكارهێنانەوە (ڕیسایكلینـ)ـی ئاوی قورس و پاشەڕۆكان، سەوزكردنی شار و زیادكردنی ڕووبەری سەوزایی، پاڵاوتنی نەوت بە تەكنۆلۆژیای نوێی ناسراو بە تەكنۆلۆژیای سەوز، پرۆژە هاوبەشەكانی نێوان هەردوو كەرتی گشتی و كەرتی تایبەت لە بواری دابینكردنی وزەی خاوێندا، کەمکردنەوەى زیانەکانی بەنزین و کارکردن بە گواستنەوەى گشتی و سوودوەرگرتن لە گازی هاوەڵ".
هەرێمی كوردستان لەسەر نەخشەی جیهانیی گۆڕانی كەشوهەوایە
لە بارەى گرنگیی هەرێمی کوردستان لەسەر نەخشەى جیهانیی گۆڕانی کەشوهەوا، عەبدولڕەحمان سدیق گوتی: "دەستەی پاراستن و چاككردنی ژینگەی هەرێمی كوردستان، لەگەڵ وەزارەتی ژینگەی عێراق و بە سەرپەرشتیی بەرنامەی نەتەوە یەكگرتووەكان بۆ گەشەپێدان، لە وۆركشۆپی ئاستی باڵای مانگی حوزەیرانی ساڵی 2021 بۆ دیاركردنی ئاستی خواستی عێراق لە بەڵگەنامەی پشكدارییە نیشتمانییەكان، بەشدار بووە".

سەرۆکی دەستەی پاراستن و چاككردنی ژینگە ئاماژەشی بەوەکرد کە، لەو بەڵگەنامەیەدا عێراق و هەرێمی كوردستان، پابەندبوونی خۆیان ڕادەگەیەنن، بۆ دیاریكردنی توانا و هەوڵەكانیان بۆ ڕووبەڕووبوونەوەی گۆڕانی کەشوهەوا بۆ ماوەی ١٠ ساڵی نێوان 2021 هەتا 2030، بە مەرجی سەقامگیریی سیاسی لە عێراقدا، بۆ ئەوەی ئەم كارانە بکەن: كەمكردنەوەی بڕی گازە دەردراوەكان هۆكاری گەرمی بە ڕێژەی 1% تا 2% بە هەوڵی ناوخۆیی، كەمكردنەوەی گازە دەردراوەكانی هۆكاری گەرمی بە ڕێژەی 15% بە هاوكاریی نێودەوڵەتی، داواكردنی یارمەتیی دارایی بۆ عێراق بە هەرێمی كوردستانیشەوە بە گوژمەی ١٠٠ ملیار دۆلار بۆ ماوەی هەر ١٠ ساڵەكە، بەرهەمهێنانی بڕی 12 مێگاوات كارەبا لە سەرچاوەی وزەی خاوێنەوە".