کۆبوونەوەیەکی تایبەت بە ڕێکخستنەوەی سەنتەری شار و سیستەمی هاتووچۆی دەوروبەری قەڵای هەولێر بەڕێوەچوو

ئەمڕۆ پێنجشەممە 8/6/2023 بە سەرپەرشتیی ساسان عەونی، وەزیری شارەوانی و گەشتوگوزار و ئومێد خۆشناو، پارێزگاری هەولێر و بە ئامادەبوونی د. سەرباز نەجیب، ڕاوێژکاری سەرۆکی حکوومەتی هەرێمی هەرێمی كوردستان و ژمارەیەکی دیکە لە بەرپرسانی فەرمانگە پەیوەندیدارەكان، کۆبوونەوەیەکی تایبەت بە ڕێکخستنەوەی سەنتەری شار و پەرەپێدانی هاتووچۆی دەوروبەری قەڵای هەولێر بەڕێوەچوو. 
لە کۆبوونەوەکەدا، دوای ئەوەی چەند بڕیار و ڕاسپاردەیەکی کۆبوونەوەی پێشووتر خرایەڕوو، تیشک خرایە سەر پەرەپێدان و باشترکردنی سیستەمی هاتوچۆی ناو سەنتەری شار و دەوروبەری قەڵاتی هەولێر و ڕێکخستنەوەی شەقام و شوستەکان و ئەو شوێنانەی کە پێویستییان بە پاککردنەوە و چاککردن هەیە، هەروەها کۆبوونەوە جەختی لە چارەسەرکردنی هەموو ئەو شوێن و شەقامە سەرەکییانەش کردەوە کە لە چەند جێگایەکی شاری هەولێر قەرەباڵغییەکی زۆریان کەوتووەتەسەر و بەهۆی زۆری ژمارەی ئوتۆمبێلەوە دووچاری خنکان هاتوون، بۆ ئەو مەبەستەش، لایەنە پەیوەندیدارەکانی ڕاسپراردران بە هەماهەنگی یەکتر و لە ڕێگەی لیژنەیەكی هاوبەش لەگەڵ قائیمقامیەتی ناوەند چارەسەری ئەو پرسە بکرێت.
ئامانج لەو كۆبوونەوەیە چارەسەركردنی گرفتی جەنجاڵی و ڕێكخستنەوەی شەقامەكانی دەوروبەری قەڵاتی هەولێرە بۆ ئەوەی سیمایەكی جوان بە زۆنەكە ببەخشێت و ڕەنگدانەوەیەكی كەلتووری هەبێت بە تایبەتی بەهۆی ئەوەی ڕۆژانە ژمارەیەكی زۆری گەشتیار سەردانی ئەو زۆنەی شاری هەولێر دەكەن. لەوبارەیەشەوە وەزیری شارەوانی و پارێزگاری هەولێر، جەختیان لەسەر بەزوویی جێبەجێكردنی کارەکان كردووە بە دروستكردنی لیژنەیەكی هاوبەش بۆ ئەوەی لە ماوەی شەش مانگدا هەموو ئەو کارانە جێبەجێ بكرێت.