كۆمسیۆنى باڵاى سه‌ربه‌خۆى هه‌ڵبژاردنه‌كان ئاشكراى ده‌كات، ئه‌نجومه‌نى وه‌زیران به‌نووسراوێك ئاگاداریانى كردووه‌ته‌وه، كه هه‌ڵبژاردنى ئه‌نجومه‌نى پارێزگاكانى عێراق (جگه له هه‌رێمى كوردستان) بۆ كاتێكى تر دوابخرێت و داواش كراوه، واده‌یه‌كی دیكه بۆ ئه‌نجامدانى پێشنیاز بكرێت.
سه‌ربه‌ست مسته‌فا، سه‌رۆكى ئه‌نجومه‌نى كۆمسیاران له كۆمسیۆنى باڵاى سه‌ربه‌خۆى هه‌ڵبژاردنه‌كانى عێراق، ڕایگه‌یاند: "ئه‌نجومه‌نى وه‌زیرانى عێراق به نووسراوێك كه تایبه‌ته به دیاریكردنى واده‌ى هه‌ڵبژاردنه‌كانى ئه‌نجومه‌نى پارێزگاكان و ئاراسته‌ى كۆمسیۆنى كردووه، هه‌ڵبژاردنه‌كانى دواخست".
به‌پێی لێدوانى سه‌رۆكى كۆمسیاران، حكوومه‌ت له نووسراوه‌كه‌یدا، كه له دانیشتنى 12/ 9/ 2017 ده‌ری كردووه، كۆمسیۆنى ئاگادار كردووه‌ته‌وه، واده‌یه‌كی دیكه بۆ هه‌ڵبژاردنه‌كان پێشنیاز بكه‌ن، به‌شێوه‌یه‌ك له گه‌ڵ ماده‌ى 46/ یه‌كه‌م له یاسای هه‌ڵبژاردنه‌كانى ئه‌نجومه‌نى پارێزگاكان و قه‌زا و شاره‌دێكان بۆ ساڵى 2008ى هه‌مواركراو، بگونجێت.
پێشتریش هه‌ڵبژاردنه‌كان كه ده‌بووایه له 20ى نیسانى 2017 به‌ڕێوه بچوایه، دواخرا و ئه‌مه جارى دووه‌هه‌مه ئه‌و هه‌ڵبژاردنه داوده‌خرێت.
كوردستان تیڤی/ رفعت مزورى
کۆمێنت (0)
تا ئێستا هیچ کۆمێنتێک نەکراوە.