جێگره كورده‌ی ئه‌ردۆغان رایده‌گه‌ێنێت، بڕیاری درێژكردنه‌وه‌ی ماوه‌ی ئه‌نجامدانی ئۆپراسیۆن له ده‌ره‌وه‌ی سنوور، له دژی هه‌رێمی كوردستاندا نییه.
به پێی هه‌واڵێكی كوردستان 24 ، مه‌هدی ئیكه‌ر، جێگری سه‌رۆكی پارتی داد و گه‌شه‌پێدانی توركیا رایگه‌یاندووه:بڕیاری درێژكردنه‌وه‌ی ئۆپراسیۆنی هێزه سه‌ربازییه‌كانی توركیا بۆ ده‌ره‌وه‌ی سنوور، له دژی ئێوه نییه.
ئیكه‌ر گوتی: په‌یامم بۆ به‌ڕێز مه‌سعوود بارزانی و خوشك و برایان له‌و ناوچه‌یه ئه‌وه‌یه، ئه‌م بڕیاره به هیچ شێوه‌یه‌ك له دژی خوشك و برایانمان له هه‌رێمی كوردستان نییه، 14 سه‌ده‌یه ئێمه پێكه‌وه ده‌ژین، پێكه‌وه شارستانییه‌تمان بنیاتناوه، بێگوومان له‌وێ توركمان و عه‌ره‌ب و سریان و ئێزدییه‌كانیش هه‌ن و هه‌مووان پێكه‌وه ده‌ژین.
رۆژی شه‌ممه 23/9/2017 په‌رله‌مانی توركیا به زۆرینه‌ی ده‌نگ بڕیاریدا بۆ ماوه‌ی ساڵێكی دیكه، سوپای توركیا ئۆپراسیۆن له ده‌ره‌وه‌ی سنووره‌كانی ئه‌نجام بدات.
مه‌هدی ئیكه‌ر، كوردێكی شاری دیاربه‌كره‌و جێگری سه‌رۆكی پارتی داد و گه‌شه‌پێدانی توركیایه، كه ره‌جه‌ب ته‌یب ئه‌ردۆغان سه‌رۆكایه‌تی ده‌كات ، پێشتریش پۆستی وه‌زاری له حكومه‌تی توركیادا هه‌بووه .
كوردستان تیڤی: رزگار تاهیر
کۆمێنت (0)
تا ئێستا هیچ کۆمێنتێک نەکراوە.