یانەی ریاڵ مەدرید دەیەوێت لە زستانی داهاتوودا ریزەكانی تۆكمەتر بكات و لە ئێستاشەوە گرنگی بە جۆلیان دراكسلەری ئەڵمانی و ئەستێرەی یانەی پاریس سان جێرمان دەدات.
رۆژنامەی بێڵدی ئەڵمانی بڵاویكردووەتەوە یانەی ریاڵ مەدرید لە زستانی داهاتوودا بۆ گواستنەوەی دراكسلەر دەكەوێتە جوڵە و ئامادەیە لە پێناو گواستنەوەی ئەو یاریزانەدا بڕی 35 ملیۆن یۆرۆ خەرج بكات.
هەمان سەرچاوە بڵاویكردووەتەوە لە ئێستادا ریاڵ مەدرید چاودێری دۆخی دراكسلەر دەكات، ئەوەش لەكاتێكدایە یانە پاریسییەكە گرێبەستی لەگەڵ نێیمار و مباپێ-دا واژوو كردووەو دەستبەرداری هیچ یەكێك لە دی ماریا و تیاگۆ مۆتا و ڤیراتی-ش نەبووە.
بەپێی چەند سەرچاوەیەك دراكسلەر دەیەوێت لەیانەیەكدا یاری بكات وەك یاریزانی سەرەكی مامەڵەی لەگەڵدا بكرێت و هەلی زیاتری یاریكردنی پێ ببەخشرێت.
جۆلیان دراكسلەری تەمەن 24 ساڵ گرێبەستەكەی لەگەڵ پاریس سان جێرمان هاوینی 2021 كۆتایی دێت و زستانی رابردوو بەرامبەر 40 ملیۆن یۆرۆ لە یانەی ڤۆلفسبۆرگی ئەڵمانییەوە رویكردە پاریس.
كوردستان تیڤی/ رفعت مزورى
کۆمێنت (0)
تا ئێستا هیچ کۆمێنتێک نەکراوە.